Saılaýshy tiziminde 130 mln adam joq: Úndistanda ereýilge shyqqandar qamaýǵa alyndy

Nıý-Delıdiń ortalyǵyna myńdaǵan polıtsııa qyzmetkeri men áskerı kúshter jumyldyryldy. Qala ortalyǵyndaǵy iskerlik aýdanda mobıldi ınternet qyzmeti ýaqytsha toqtatylyp, ondaǵan metro stantsııasy men bazar jabyldy. Narazylyq bildirýshiler jınalmaq bolǵan Djantar-Mantar alańynda da sherýge jol berilmedi.

Basqa qalalarda da narazylyq aktsııalary ótip, qatysýshylar saılaý komıssııasynan jaýapkershilikti talap etti.

Narazylyqqa qatysýshylardyń biri Iogendra Solankı bıliktiń áreketin synǵa aldy.

— Bul — halyqtyń quqyǵyn buzý. El endi buǵan tózbeıdi, — dedi ol.

Jastar qozǵalysynyń málimetinshe, Mýmbaıdan Nıý-Delıge ushyp kelgen belsendilerdiń arasynda «Tarakan Djanta» partııasynyń negizin qalaýshy Abhıdjıt Dıpke, sondaı-aq Saýráv Das pen Ashýtosh Ranký da bolǵan. Olar ushaq áýejaıǵa qonǵannan keıin polıtsııanyń qolyna túsken.

Telearnalar kórsetken beınejazbada Abhıdjıt Dıpkeniń ushaq ishinde polıtsııa qyzmetkerlerimen sózge kelgeni kórinedi.

Jastar qozǵalysy belsendilerdiń ustalýyn aıyptap, narazylyqty jalǵastyratynyn málimdedi. BAQ-tyń habarlaýynsha, Mýmbaıda da shamamen 400 adam ustalǵan.

Jergilikti BAQ Oppozıtsııa ókilderiniń arasynda Batys Bengalııa shtatynyń burynǵy basshysy Mamata Banerdjı, Delıdiń burynǵy basshysy Arvınd Kedjrıval jáne Kerala shtatynyń burynǵy basshysy Pınaraıı Vıdjaıannyń da ustalǵanyn habarlady.

Narazylyqtyń kúsheıýine saılaýshylar tizimin qaıta qaraý kezinde kóptegen adamnyń aty jóni tizimnen alynyp tastalǵany týraly málimetter sebep boldy. Oppozıtsııa bul áreket aldaǵy saılaýdyń nátıjesine áser etýi múmkin dep esepteıdi.

Saılaýshylar tizimin qaıta qaraý kezinde shamamen 130 mıllıon jazba alynyp tastalǵan. Olardyń qatarynda turǵylyqty jerin aýystyrǵan, mekenjaıy boıynsha tabylmaǵan nemese qaıtys bolǵan dep tirkelgen adamdar bar.

Oppozıtsııa ókilderi tizimnen azamattardyń aty jónin alyp tastaý sońǵy shtattyq saılaýlardyń nátıjesine yqpal etýi múmkin dep sanaıdy. Al Saılaý komıssııasy tizimnen negizsiz shyǵarylǵan, biraq daýys berýge quqyǵy bar azamattar qaıta tirkele alatynyn málimdedi.

Bıliktegi «Bharatııa Djanata» partııasy zańsyz áreketterge jol berilgenin joqqa shyǵaryp, oppozıtsııany jalǵan aqparat taratty dep aıyptady.

Bul daý 2027 jyldyń basynda bastalatyn shtattyq saılaýlar qarsańynda eldegi saıası ahýaldy odan ári shıelenistirip otyr. Oppozıtsııa jetekshisi Rahýl Gandı saılaý máselesine qatysty kúresti jalǵastyratynyn málimdedi. Al «Bharatııa Djanata» partııasynyń ókili Ravı Shankar Prasad qarsylastaryn narazylyqty óz saıası maqsattaryna paıdalanyp otyr dep aıyptady.

Saılaýshylar tizimine qatysty daý Úndistanda saılaý úderisiniń ashyqtyǵy men azamattardyń beıbit sherýge shyǵý quqyǵyna baılanysty máselelerdi qaıta kóterdi.

Buǵan deıin Brıýsselde narazylyq bildirýshiler men polıtsııa arasynda qaqtyǵys bolǵan edi.