Saılaýhan Aýhadıev: Sarabdal saıasatty jalǵaıtyn salmaqty adam keldi

ÓSKEMEN. QazAqparat - Óskemen qalasy aqsaqaldar keńesiniń tóraǵasy Saılaýhan Aýhadıev QR Prezıdenti Qasym-Jomart Toqaevtyń qyzmetine kirisken kúnin el tarıhyndaǵy eleýli kezeń dep baǵalaıdy. Óńirge belgili aqsaqal bul týraly QazAqparat tilshisine aıtty.

«Prezıdentti ulyqtaý saltanatyn úı-ishimizben otyryp, kógildir ekrannan tamashaladyq. Otbasymyzben qatty qýanyp jatyrmyz. Birge júrgen aqsaqaldarmen osy jóninde oı bóliskenmin. Olar da búgin qazaq halqy úshin óte baqytty kún bolǵanyn aıtyp jatyr. Jańa Prezıdenttiń qadamy Qazaqstan úshin sátti bolsyn. Seksenge kelgen qarııa retinde dastarhan basynda jaqsy yrymmen bata jasadym», - deıdi qarııa.

Qalalyq aqsaqaldar keńesiniń tóraǵasy osy jasqa deıin bılik aýysqan birneshe kezeńdi bastan ótkergenin aıtady. Kópti kórgen kónekóz aqsaqal jańa Prezıdenttiń qazaq eli úshin qandaı basshy bolatynyn da boljady.

«Osy jasqa kelgenshe birneshe júıeniń aýysqanyn kórippiz. Qasym-Jomart Toqaev - jer sharyndaǵy memleketterdiń barlyǵyna tanymal tulǵa. Toqaev basqarǵan kezeńde elimizde beıbitshilik saqtalady dep kútemin. Halyqtyń ál-aýqaty barlyq salada jaqsaratynyna senimdimin. Óıtkeni saılaý kezinde baǵdarlamasyn búge-shúgesine deıin elekten ótkizdim. Ózi aıtqandaı, ol sózdiń emes, istiń adamy. Sondyqtan, el bolashaǵy jarqyn bolyp, ekonomıkamyz qarqyndy damıdy dep oılaımyn. Tuńǵysh Prezıdenttiń sarabdal saıasatyn jalǵastyratyn salmaqty adam kelgeni kóńilimizge senim uıalatty», - deıdi Saılaýhan Aýhadıev.

Aıta keteıik, búgin elordadaǵy Táýelsizdik saraıynda jańadan saılanǵan Qazaqstan Prezıdenti Qasym-Jomart Toqaev Qazaqstan halqyna ant bergen bolatyn.