Saılaýǵa úı janýarlaryn alyp barýǵa bola ma

ALMATY. QazAqparat - Óńirlik kommýnıkatsııalar qyzmetinde ótken brıfıngide Almaty qalalyq aýmaqtyq saılaý komıssııasynyń tóraǵasy Janna Asanova «Daýys berýge úı janýarlaryn alyp barýǵa bola ma?» degen saýalǵa jaýap berdi, dep habarlaıdy QazAqparat tilshisi.

«Daýys berý kúni saılaý ýchaskesine ıtpen kelýge tyıym salynady, óıtkeni bizdegi saılaý ýchaskeleriniń basym bóligi oqý oryndarynda ornalasqan. Úı janýarlaryn oqý oryndaryna kirgizýge bolmaıdy. Sondyqtan, daýys berý kúni saılaý ýchaskesinde eshbir qıyndyq bolmas úshin úı janýaryńyzǵa aldyn ala qam jasaǵanyńyz jón. Sondaı-aq úı janýarlaryn serýendetý erejeleri de bar»,- dep jaýap berdi Janna Asanova jýrnalısterdiń suraǵyna.Sonymen qatar ol saılaý ýchaskeleriniń barlyq músheleri standartty emes yqtımal jaǵdaılarǵa daıyn bolýy kerektigin aıtty.
Buǵan deıin turǵylyqty tirkeýi joq almatylyqtar úshin 20 qarasha kúni 55 daýys berý ýchaskesi jumys isteıtini turaly jazǵan edik.
Aıta keteıik, megapolıste 1 mıllıon 170 myńnan astam adam daýys berý quqyǵyna ıe.