Saılaýǵa upaı jınaý úshin qatyspaımyz – «Aýyl» partııasy tóraǵasy

ASTANA. QazAqparat – Búgin elordada «Aýyl» halyqtyq-demokratııalyq partııasynyń kezekten tys XXII sezi ótip jatyr. Sezd barysynda 19 naýryzǵa belgilengen Májilis saılaýyna qatysatyn kandıdattar tizimi bekitilip, saılaýaldy baǵdarlama qabyldanady, dep habarlaıdy QazAqparat tilshisi.

«Aýyl» partııasy Parlament saılaýyna osymen úshinshi ret qatysqaly otyr. 2017 jyly alǵash qatysqanda kórsetkishimiz kóńilden shyqpady. Odan beri bizdiń partııa boı túzep jumysty jandandyra tústi. Partııanyń tolyq qurylymyn qalyptastyrdyq. Saıası uıymǵa aınaldyq dep tolyq aıta alamyz. 2021 jylǵy saılaýda biz Parlament Májilisine óte almadyq. Degenmen 237 kandıdatymyz jergilikti máslıhattar depýtaty atandy. Sonymen qatar aýyl ákimderi saılaýynda bizdiń partııanyń 35 múshesi aýyl ákimi bolyp saılandy», - «Aýyl» partııasynyń tóraǵasy Álı Bektaev sezd aldynda BAQ ókilderiniń saýalyna jaýap bere turyp.

Partııa basshysy málimdegendeı, aýyldyqtar bıylǵy saılaýdan úlken úmit kútip otyr. Saıası naýqanǵa qatysýǵa daıyn.

«Búgingi sezde bizdiń partııanyń saılaýaldy baǵdarlamasy men kandıdattar tizimi talqylanady. Bizdiń partııanyń saıası baǵyty ózgergen emes,ózgermeıdi de, ol - aýyl men aýyl sharýashylyǵy salasyn damytý. Biz saılaý úshin nemese upaı jınaý úshin qatyspaımyz. Ana salany, myna salany qamtımyz nemese qalalardaǵy máselelerdi sheshýge qatysamyz degen sekildi málimdeme jasaǵan emespiz. Aýyl - bizdiń turaqty bolashaǵymyz. Sebebi aýyl – elimizdiń negizi, ekonomıkanyń draıveri. Aýyl bolsa azyq-túlik bolady, as bolsa elimizdiń, halqymyzdyń amandyǵy bolady. Qaı memlekette bolsa da, azyq-túlik qaýipsizdigin qamtý - aldyńǵy qatary máseleniń biri. Eger biz aýyldyń jaǵdaıyn jaqsartyp, turaqtandyrsaq onda qalanyń jaǵdaıy jaqsarady», - deıdi ol.

Á.Bektaevtyń aıtýynsha, aýylda óndirilgen ónimniń ár tonnasy qalada kem degende 4-5 adamdy jumyspen kamtıdy.

«El ekonomıkasy aýyldyń damýyna tikeleı baılanysty. Sondyqtan bizdiń saıası baǵytymyz tek aýylmen baılanysty bolady. Májilis saılaýynan sátti ótken kúnniń ózinde biz aýyldyń máselesin kóterýden jalyqpaımyz. Sezge deıin oblystardaǵy barlyq fılıalda partııa konferentsııalary ótti. Nátıjesinde 600-den astam kandıdat máslıhattardyń depýtattyǵyna usynyldy. Bul aldyńǵy jylmen salystyrǵanda eki ese kóp», - dep tolyqtyrdy partııa tóraǵasy.