Saılaýǵa qatysý úshin Ystanbuldan arnaıy kelgen azamat tańǵaldyrdy – táýelsiz baıqaýshy

NUR-SULTAN. QazAqparat – Elordada saılaýdyń ótý barysyn baıqaýshy Italııadaǵy Eýroparlament depýtaty Fýlfıo Martýshello saıası oqıǵaǵa qatysý úshin Qazaqstanǵa arnaıy kelgen otandasymyzdyń belsendiligin erekshe atap ótti, dep habarlaıdy QazAqparat tilshisi.

«Men saılaý bastalǵaly birneshe ýchaskege bardym. Bizdiń esep boıynsha ol ýchaskelerde tańerteń saılaýǵa qatysýshylardyń 42% óz tańdaýyn jasady. Bul - halyqtyń belsendiliginiń kórsetkishi jáne ol bul úrdis biz ketem degenshe jalǵasyn tapty. Sonymen qatar, saılaý ýchaskelerinde tıisti sanıtarlyq talaptardyń oryndalý barysyn baıqadym. Saılaý protsesin baqylaý munymen bitpeıdi, biz basqa da elderden kelgen áriptesterimizben talqylaý ótkizemiz. Odan bólek, azamattardyń osy saılaýǵa qatysty basqa da suraqtary bolsa, ony meniń elektrondy poshtama joldaý múmkindikteri bar», - dedi Fýlfıo Martýshello elordada táýelsiz halyqaralyq baıqaýshylardyń qatysýymen ótken baspasóz máslıhatynda.

Onyń aıtýynsha, saılaýǵa kelýshilerdiń arasynda áıelder men jastar basym.

«Biz saılaý ýchaskesine barǵanda aldymen halyqpen sóılesemiz, ıaǵnı saılaýshylarmen áńgimelesemiz. Sodan soń ǵana uıymdastyrýshylarmen suhbattasamyz. Ózim barǵan saılaý ýchaskelerinde birneshe jaıtqa kýá boldym. Bir kisi saılaý ýchaskesiniń ashylýyna 1 saǵat qalǵanda erte kelip alǵan. Belsendi saılaýshymen sóılesip, sáttilik tiledim. Ekinshi jaǵdaı - Qazaqstan azamaty saılaýǵa qatysý úshin Ystanbuldan (Túrkııa) arnaıy kelgen, bul shynyn aıtý kerek, meni tańǵaldyrdy», - deıdi ol.