Saılaýǵa qatysý - bolashaǵymyzǵa degen qamqorlyǵymyzdyń belgisi - 80 jastaǵy saılaýshy
ASTANA. 15 qańtar. QazAqparat /Jasulan Joldybaev/ - Búgin Astanadaǵy №3-inshi saılaý ýchaskesinde elordanyń 80 jastaǵy turǵyny Áhlıma Beısenova Parlament Májilisi men máslıhat depýtattarynyń saılaýynda óziniń daýysyn berdi.
«Saılaýǵa kelip, daýys berý - bolashaǵymyzǵa degen qamqorlyǵymyzdyń belgisi, halyq sanalylyǵynyń úlgisi. Sondyqtan, saılaý syndy naýqanǵa qatysý árbir qazaqstandyq úshin abyroıly is bolýy shart», - deıdi ol.
Densaýlyǵy erkin júrip-turýyna múmkindik bermese de, keıýana búgingi saılaýǵa kelýge úlken qajyrlyq tanytty.
«Ózimniń densaýlyǵym syr berip, júrýge qınalsam da, saılaýda daýys berý úshin ózim suranyp keldim. Elde qansha saılaý boldy, solardyń barlyǵyna qatysyp kelemin», - deıdi Á. Beısenova.
Aqmolada týyp-ósken qart áje, qosaǵynan 40 jasynda aıyrylǵan.
«Bes balany ósirip, olarǵa joǵary bilim berdim, aıaqqa turǵyzdym. Olardyń barlyǵy osy Astanada turady. Segiz nemerem bar. Joqshylyq ýaqytty da kórdik, qazir zaman jaqsy. Zeınetaqymyzdy ýaqytynda alamyz. Balalarymnyń barlyǵy baspanaly bolyp otyr. Óz basymda 3 bólmeli úıim bar. Eldegi turaqtylyq - bizdiń memleketimizdiń eń basty qundylyǵy. Halqymyzdyń arasy ashylyp, shyrqy buzylmasa eken dep tileımin», - dedi ol.
