Saılaýǵa qatysty zań erejeleri qatań saqtalýda - ıÝ.Býlýktaev
ASTANA. QazAqparat - Otandyq saıasattanýshylar prezıdenttik saılaý úderisin jiti baqylaýda. Olardyń birnesheýiniń buǵan qatysty bildirgen pikiri mynandaı boldy:
Marat ShIBUTOV, Qazaqstan Shekara aýmaǵyndaǵy yntymaqtastyq qaýymdastyǵynyń ókili.
Bul saılaýdyń ózgelerinen eń basty aıyrmashylyǵy nede? Munyń aldyndaǵy saılaýda úmitkerler saıası kózqarastarǵa basymdyq berdi, baǵdarlamalaryna konservatızmdik shyraı bergeni de aqıqat.
Búgingi saılaýdaǵy úmitkerlerdiń baǵdarlamalarynda tyń saıası tanymdar men kózqarastardyń jıyntyǵy qamtylǵany baıqalady. N.Nazarbaev erkin bolmystaǵy baǵdarlama usynyp otyr. Bıznes damýyna erekshe kóńil aýdardy, ol degenimiz, eń aldymen jańadan ashylatyn jumys orny. Bul arada eshqandaı da áleýmettik bedelshildik-popýlızm belgileri baıqalmady. Ol birqatar alyp bıznes jobalarynyń nusqasyn jasap ta berdi. Bul arada erekshe nazar aýdaratyn másele, bul joly ınfraqurylymdyq jobadan góri, ınstıtýttyq baǵdarlamaǵa aıryqsha mán berdi. Qaıtalap aıtaıyn, bul arada eshqandaı da áleýmettik popýlızm daqpyrty joq.
Buǵan qosymsha, eldegi turaqtylyq ustanymy da saılaýshylardyń kóńilinen shyǵary haq. Jańadan qosylǵan eki úmitkerimizdiń biri - Turǵyn Syzdyqovtyń esimi neomarksızm ilimin qoldaýshy ári antıglobalızm qaǵıdattaryn jaqtaýshy retinde belgili bola bastady. Onyń baǵdarlamasy batystyq tártip pen ondaǵy memlekettik júıeni joqqa shyǵarýǵa negizdelgeni jasyryn emes. Bul da bizdiń saılaýshylarymyz úshin tańsyq qubylys.
Úshinshi úmitkerimiz - Ábilǵazy Qusaıynov tól baǵdarlamasynyń negizgi eki baǵytymen saılaýshy nazaryn ózine aýdardy. «Jasyldar» qozǵalysynyń jebeýshisi bola júrip, ekinshi jaǵynan tehnofobııany, tehnıkalyq qaýipsizdik máselesin aldyńǵy shepke shyǵardy.
ıÝrıı BÝLÝKTAEV, Qazaqstan Strategııalyq zertteýler ınstıtýtynyń aǵa ǵylymı qyzmetkeri.
Birinshiden, Qazaqstandaǵy prezıdenttik saılaý bul joly kezekten tys ótkeli otyr. Saılaýshylardyń da, Ortalyq saılaý komıssııasynyń da ortaq bir maqsatqa jumylýy da sondyqtan dep oılaımyn. Saılaýǵa qatysty zań erejeleri qatań saqtalýda. Ekinshiden, elimizge aıaq basqan sheteldik baıqaýshylardyń tolassyz legi, syrttaı qaraǵanda, álem jurtshylyǵy nazarynyń Qazaqstanǵa aýyp otyrǵanyn baıqatady.
Qazir prezıdenttikke kandıdat úsh azamat ta eldiń túkpir-túkpirin aralap, saılaýshylarmen kezdesýde. Kandıdattardyń elektorat aldynda qoıǵan aıqyn ustanymy men kózqarasy, baǵdarlamasy aıqyndalyp ta qaldy. Demek, belgili kúni daýys berýge baratyn elimizdiń árbir azamatynyń kimge daýys beretini - óz erkindegi is.
Halyq - úsh úmitkerdiń de saılaýaldy baǵdarlamasymen buqaralyq aqparat quraldary arqyly jaqsy tanysty dep oılaımyn. Saılaýǵa jasy jetken barlyq azamattarǵa elektrondy buqaralyq aqparat quraldary arqyly oılaryn ashyq aıtýǵa múmkindik berilgen. Kez kelgen saılaý kez kelgen memleket úshin ǵana emes, qoǵam úshin de úlken synaq bolyp qala bermek. Saılaýshy kimge daýys berse de eliniń bolashaǵy úshin daýys beredi. Meni saılaýshylarymyzdyń búgingi belsendiligi qýantady.
Andreı ChEBOTAREV, Tuńǵysh Prezıdent kitaphanasynyń sarapshysy
Meniń paıymdaýym men dál búginge deıin kózimniń tikeleı jetkeni - Qazaqstanda saılaý naýqany meılinshe belsendi túrde júrip jatyr. Resmı sanattaǵy buqaralyq aqparat quraldary Іs basyndaǵy Memleket basshysynyń saılaýaldy baǵdarlamasyn tanystyra otyryp, balamaly kandıdattarǵa da aıryqsha mán berip otyr.
Balamaly ol kandıdattardyń ózderiniń elektrondy buqaralyq aqparat quraldary da belsendi túrde qyzmet atqarý ústinde. Máselen, el prezıdenttigine kandıdat Turǵyn Syzdyqovtyń «Kommýnıst Kazahstana» atty óziniń daýysyn, oıyn, pikirin jetkizetin nasıhat minberi bar. Qazaqstan kommýnısteriniń veb-saıttary da turaqty da qarqyndy, toqtaýsyz nasıhattaý isin atqaryp keledi.
Ótken úgit-nasıhat maýsymy kezeńinde barlyǵy 11 myńnan astam nasıhat materıaldary halyqtyń kózi men qulaǵyna jetken. Bul óte jaqsy kórsetkish ári baıqaýshylar talaby turǵysynan alǵanda da «jetkilikti» degen baǵa berýge bolady. Alaıda, saılaý naýqany áli de aıaqtalmaǵanyna oraı kandıdattardy nasıhattaý sharalary jalǵasa beredi. Sol sııaqty, jergilikti jerdegi saılaý shtabtarynyń málimetine súıener bolsaq, úgit-nasıhat jumystarynyń sandyq kórsetkishi ulǵaıyp, áli de óse túsetini anyq.
«Egemen Qazaqstan»
