Saılaýǵa daıyndyq bastalǵaly 200-den astam ótinish túsken – OSK
Asylbek Smaǵulov 2022 jylǵy 22 qyrkúıek pen 18 qarasha aralyǵynda OSK-ǵa kelip túsken jeke jáne zańdy tulǵalardyń ótinishterin, suraýlaryn, jaýaptaryn, usynystary men habarlamalaryn qaraý statıstıkasyn baıandady.
«Jalpy sany 203 ótinish tústi: onyń ishinde zańdy tulǵalardan 45, jeke tulǵalardan – 120, BAQ-tan – 38 ótinish bar. Ótinishter sıpaty boıynsha kelesideı bólindi: 111 – zańnamany túsindirý jáne saılaýdy uıymdastyrý jáne ótkizý jónindegi suraýlarǵa jaýaptar, 23 – BAQ úshin tólem mólsheri, telearnalarda efır ýaqytyn berý sharttary men tártibi, úgit kezeńinde úgit materıaldaryn ornalastyrý kesteleri týraly málimetter jáne 15-i – turǵylyqty jeri boıynsha saılaý ýchaskelerinde jáne aýmaqtyq saılaý komıssııalarynyń quzyretine kiretin ózge de máseleler boıynsha jeke tulǵalardan kelgen. Sonymen birge 29 ótinish – QR Prezıdentiniń kezekten tys saılaýyna qatysatyn saılaýshylar tiziminen derbes derekterdi keri qaıtaryp alý jóninde bolǵan», - dedi Asylbek Smaǵulov Ortalyq saılaý komıssııasynyń otyrysynda.
Oǵan qosa, spıker saılaýǵa tikeleı qatysy joq 25 másele túskenin habarlady.
«Barlyǵy 103 ótinishke jaýap berildi, onyń 32-si oryndalyp jatyr, 8-i nazarǵa alyndy. Biz ótinishterge óz quzyretterimiz ben ókilettikterimiz sheńberinde ǵana jaýap beretinimizdi birneshe ret túsindirgenimizge qaramastan, OSK quzyretine jatpaıtyn máseleler jóninde 60 ótinish kelgen. Olar basqa memlekettik organdarǵa jiberildi», - dedi A. Smaǵulov.
