Saılaýǵa bólingen bıýdjet qarajatynyń ár teńgesine uqyptylyqpen qaraýymyz kerek - Q.Turǵanqulov

ASTANA. QazAqparat - Saılaýǵa bólingen bıýdjet qarajatynyń ár teńgesine uqyptylyqpen qaraýymyz kerek. Búgin QR Parlamenti Májilisi men máslıhat depýtattary saılaýyn ázirleý jáne uıymdastyrý máseleleri jónindegi respýblıkalyq semınar-keńeste sóz sóılegen QR Ortalyq saılaý komıssııasynyń tóraǵasy Qýandyq Turǵanqulov osylaı dedi.

«Saılaý organdarynyń basty mindeti - saılaýdyń zańdylyǵyn qamtamasyz etý, ıaǵnı, saılaý zańnamasy men jalpyǵa birdeı tanylǵan halyqaralyq ustanymdardyń talaptaryna sáıkes ádil jáne ashyq saılaý naýqanyn ótkizý», - dedi Q.Turǵanqulov.
Sonymen qatar Ortalyq saılaý komıssııasynyń tóraǵasy keńeske qatysýshylardyń nazaryn saıası naýqandy ótkizýge bólingen bıýdjet qarajatyn únemdeý máselesine aıryqsha nazar aýdartty. «Qazirgi kúrdeli ekonomıkalyq jaǵdaıda qarajattyń tıimsiz jumsalýyn boldyrmaý jáne Elbasynyń árbir bıýdjet teńgesine uqypty qaraý týraly nusqaýyn naqty ustanýymyz qajet», - dedi ol.
Sóz sońynda ol semınar qatysýshylaryna Ortalyq saılaý komısııasy atqarǵan daıyndyq jumystary, komıssııanyń aǵymdaǵy qyzmeti men saılaý naýqanynyń barysy týraly qysqasha aqparat berip ótti. Semınarǵa oblystyq, Astana men Almaty qalalyq saılaý komıssııalarynyń tóraǵalary men hatshylary, elimizdiń saıası partııalarynyń ókilderi, sondaı-aq saılaý salasynda qyzmet etetin halyqaralyq uıymdardyń ókilderi qatysýda.