Saılaýǵa alǵash ret qatysyp, óz tańdaýymdy jasadym – 18 jastaǵy stýdent

Oral qalasynda H.Dospanova atyndaǵy №30 mektepte ornalasqan №435 ýchaskelik komıssııa tóraıymy Darıa Qabdýllıevanyń málim etkenindeı, munda barlyǵy 2 394 saılaýshy tirkelgen.

Onyń sózine qaraǵanda, 18 jastaǵy Ramıl Demeshev, sondaı-aq jasy jetpisten asqan Kúlásh Toǵyzbaeva alǵashqylardyń qatarynda daýys berdi.

- Men 18 jastamyn. Mahambet Ótemisov atyndaǵy Batys Qazaqstan ýnıversıtetinde aǵylshyn tili pániniń muǵalimi mamandyǵyna bilim alyp jatyrmyn. Ekinshi kýrs stýdentimin. Búgin alǵash ret daýys berip, óz tańdaýymdy jasadym, - dedi Kazinform tilshisine Arýjan Berkimbaı.

QR Ulttyq ulany «Batys» óńirlik qolbasshylyǵynyń baspasóz qyzmetinen málim etkenindeı, Oral qalasyndaǵy 5517-áskerı bóliminiń sarbazdary tańǵy saǵat 06.00-de ashylǵan №479 saılaý ýchaskesine kelip, óz tańdaýlaryn jasaýda. Munda barlyǵy 400-ge jýyq saılaýshy bar.

Bul rette Ulttyq ulan áskerı qyzmetshileriniń basty mindetteriniń biri – qoǵamdyq tártip pen azamattardyń qaýipsizdigin qamtamasyz etý. Daýys berip bolǵannan keıin sarbazdar Oral qalasyndaǵy qoǵamdyq oryndarda qoǵamdyq tártip pen qaýipsizdikti qamtamasyz etý boıynsha jaýyngerlik qyzmetke kirisedi.

BQO aýmaqtyq saılaý komıssııasynyń málimeti boıynsha óńirde barlyǵy 502 saılaý komıssııasy bolsa, onyń quramyna 14 aýmaqtyq jáne 488 ýchaskelik saılaý komıssııasy kiredi. Barlyq deńgeıdegi komıssııalarda jalpy sany 3 244 múshe qyzmet atqarady.

BQO-da saılaýshylarǵa qolaıly jaǵdaı jasaý maqsatynda óńir boıynsha 488 ýchaskelik saılaý komıssııasynan turatyn jeli quryldy. Olardyń úshten birine jýyǵy, ıaǵnı 136 saılaý ýchaskesi oblys ortalyǵy Oral qalasynda ornalasqan, bul qala turǵyndaryn barynsha qamtýdy jáne qoljetimdilikti qamtamasyz etedi.

Batys Qazaqstan oblysynda 450 544 turǵyn daýys berý quqyǵyna ıe bolsa, sonyń jartysynan kóbi — 239 327 saılaýshy Oralda turady. Qalǵan 211 217 saılaýshy oblystyń 12 aýdanynda.

Eske sala keteıik, budan buryn elimizde Quryltaı depýtattaryn saılaý bastalǵanyn jazǵan edik.