«Saılaýdyń ashyq ta jarııa ótýi - memleketimiz úshin úlken syn» - respýblıkalyq basylymdarǵa sholý
***
«Egemen Qazaqstan» gazetiniń jazýynsha, Qazaqstan Táýelsizdiginiń 20 jyldyǵy qarsańynda respýblıka Premer-Mınıstriniń orynbasary - Indýstrııa jáne jańa tehnologııalar mınıstri Áset Isekeshev pen Kólik jáne kommýnıkatsııalar mınıstri Berik Kamalıev, «Qazaqstan temir joly» UK» AQ prezıdenti Asqar Mamın Memleket basshysynyń tapsyrmasymen Almaty oblysynda salynyp jatqan kólik ınfraqurylymy nysandarynyń daıyndyǵyn tekserdi. Negizgi nysandardy iske qosý men tusaýkeser rásimi bıylǵy jylǵy jeltoqsannyń 9-ynda Indýstrııalyq forým aıasynda ótkiziletin bolady. «Bul jol Qazaqstannyń kólik júıesin damytýdaǵy respýblıkanyń tranzıttik áleýetin paıdalanýda úlken múmkindikterge jol ashady. Qurylys barysynda bes myń jumys orny ashyldy. Ol iske qosylǵanda 2055 adam turaqty jumyspen qamtylady», - dep jazady basylym. Maqala «Infraqurylymdar daıyndyǵy joǵary» degen taqyryppen berilgen.
«Keshe Astanadaǵy Kongress-Holl saraıynda Táýelsizdiktiń 20 jyldyǵyna arnalǵan respýblıkalyq aqyndar aıtysy bastaldy. Mádenıet mınıstrliginiń qoldaýymen, «Samuryq-Qazyna ulttyq ál-aýqat qorynyń» demeýshiligimen ótkizilip otyrǵan bul sharanyń maqsaty - mádenıetimizdiń baǵa jetpes asyl murasy retinde aıtysty halyqqa jan-jaqty nasıhattap, onyń damýyna memlekettik deńgeıde qoldaý kórsetý, bolashaq urpaqqa aıtys óneriniń qadir-qasıetin uǵyndyrý, poezııa arqyly memlekettik tildiń arnasyn keńeıtip, damytý men nasıhattaý», - dep jazady «Egemen Qazaqstan» gazeti. Basylymnyń atap ótýinshe, úsh kúnge sozylatyn aıtysqa elimizdiń barlyq aımaqtaryndaǵy dúldúl aıtyskerlermen birge, úlken sahnaǵa endi ǵana shyǵyp júrgen daryndy aqyndar, sonymen qatar Qytaı, Mońǵolııa, Qyrǵyzstan elderiniń tańdaýly aıtyskerleri qatysyp, óz ónerlerin ortaǵa salýda.
***
«Aıqyn» gazetiniń senbilik sanynda alda ótetin Májilis saılaýyna arnalǵan kólemdi maqala «Úmitkerlerdi usyný 5 jeltoqsanda aıaqtalady» degen taqyryppen jarııalandy. basylymnyń atap ótýinshe, OSK tóraǵasy Q.Turǵanqulov málim etken derekterge sáıkes, 15 qańtarǵa taǵaıyndalǵan máslıhat depýtattarynyń kezekti saılaýyna 489 úmitker usynylǵan. Azamattardyń 63-i oblystyq máslıhattyń depýtattyǵyna, 371-i aýdandyq máslıhattyń depýtattyǵyna, al 55-i qalalyq máslıhat depýtattyǵyna úmitti. Máslıhattarǵa úmitkerlerdi usyný Qostanaı, Shyǵys Qazaqstan, Mańǵystaý jáne Aqmola oblystarynda belsendi júrgizilýde. Al Májilis depýtattarynyń saılaýyna ázirshe «Nur Otan» partııasy ǵana óz úmitkerlerin usynǵan.
***
«Alash aınasy» gazetiniń turaqty «Dat!» aıdarynda QR Ortalyq saılaý komıssııasynyń tóraǵasy Qýandyq Turǵanqulovpen aradaǵy suhbat «Saılaýdyń ashyq ta jarııa ótýi - memleketimiz úshin úlken syn» degen taqyryppen berilgen. Basylym tilshisiniń barlyq saýaldaryna tuşymdy jaýap bergen ol: «Saılaý máselesine qatysty sheteldik qaýymdastyqtar men halyqaralyq uıymdardan usynystar jasaldy. Biraq ta zańdarǵa engizilgen barlyq túzetýler Qazaqstannyń ulttyq jáne qoǵamdyq erekshelikterine oraı júzege asyrylady. Onyń ústine barlyq usynysty zańdarǵa engizý bir kúnniń, bir aıdyń jumysy emes. Sondyqtan da mundaı máseleler mańyzdy otyrystarda, dóńgelek ústelderde qaralyp, talqylanyp jatyr», - depti.
***
«Kazahstanskaıa pravda» gazetiniń jazýynsha, keshe QR Prezıdenti Ákimshiligi Basshysynyń orynbasary T.Donaqovtyń tóraǵalyǵymen Qazaqstan Respýblıkasy Prezıdentiniń janyndaǵy Quqyqtyq saıasat jónindegi keńestiń kezekti otyrysy bolyp ótti. Otyrysta elimizdegi konstıtýtsııalyq zańdylyqtyń jaı-kúıi týraly Konstıtýtsııalyq Keńestiń normatıvtik qaýlylaryn jáne joldaýlaryn iske asyrý máselesi qarastyryldy. Atalǵan másele boıynsha Konstıtýtsııalyq Keńestiń aqparaty tyńdaldy. Sonymen birge, 2010 jyldan 2020 jylǵa deıingi kezeńge arnalǵan quqyqtyq saıasat tujyrymdamasyn 2011 jylda iske asyrý jónindegi jospardyń oryndalýy boıynsha jumys qorytyndylary týraly Ádilet mınıstrliginiń esebi tyńdaldy.
