Saılaýdy uıymdastyrýshylardyń basty maqsaty - saılaýshylar arasynda kıkiljiń týdyratyn jáıttardy boldyrmaý - OSK tóraǵasy
TANA. 25 qarasha. QazAqparat /Aıdar Ospanalıev/ - Saılaýdy uıymdastyrýshylardyń basty maqsaty - saılaý naýqany barysynda saılaýshylar arasynda qandaı da bir máselege baılanysty kıkiljiń týdyratyn jáıttardy boldyrmaý.
Sondaı-aq uıymdastyrýshylar saılaý zańdarynyń buzylý jaǵdaılarynyń aldyn alyp, zań buzylǵan jaǵdaıda kemshilikti birden qalpyna keltirýge tyrysýy kerek. Bul týraly búgin elordada ótip jatqan Qazaqstan Respýblıkasy Parlamenti Májilisiniń jáne máslıhattary depýtattarynyń saılaýyna ázirlik jáne ony ótkizý máselelerine arnalǵan semınar-keńes barysynda Ortalyq saılaý komıssııasynyń tóraǵasy Qýandyq Turǵanqulov málim etti.
Onyń sózine qaraǵanda, qazirgi tańda partııalyq tizimderdi belgileý sharasy júrip jatyr jáne bul shara 5-shi jeltoqsanda aıaqtalady. Buǵan qosa osy ýaqytta máslıhat depýtattyǵyna kandıdattyqqa úmitkerlerdi usyný sharasy júzege asyrylýda. Bul jumystar 14-shi jeltoqsanǵa deıin jalǵasady. «Partııalyq tizimderdi tirkeý sharasy 15-shi jeltoqsanda, al máslıhat depýtattyǵynan úmitkerlerdi usyný 20-shy jeltoqsanda aıaqtalatyndyǵyn este ustaý kerek», - deıdi OSK tóraǵasy.
Onyń aıtýynsha, saılaý naýqany bastalǵaly Ortalyq saılaý komıssııasy qajetti qujattar men normatvtik-quqyqtyq aktiler daıyndap, olardy qajetti jerlerge jibergen. Sondaı-aq saılaý barysynda uıymdastyrylatyn negizgi is-sharalardyń kúntizbelik jospary da bekitilip, taratylǵan.
