Saılaýdy qadaǵalaý jónindegi respýblıkalyq komıssııa saılaý barysyndaǵy birqatar jekelegen kemshilikterdi atady
«Aýyl ákiminiń laýazymyna saılanatyn kandıdattarǵa qoıylatyn talaptar da joǵary ári bul da bir kemshil tus. Kandıdattardy usyný merzimi de qysqa boldy, nátıjesinde keıbir azamattar ákimdikke ózderiniń kandıdattary týraly ýaqytyly ótinishter jasaı almaı qalǵan. Budan bólek, aýdan ákimderiniń jurtshylyqpen, jergilikti qaýymdastyqpen keńester ótkizýdiń biregeı tártibi aıqyndalmaǵan. Sonymen qatar, keıbir aýdan ákimderi halyq usynǵan kandıdatýralardy qaperge almaǵan. Al kandıdattardy tirkeý barysynda olardyń tabysy men múlikteri týraly derekterine qatysty saılaý komıssııalary az-maz naqtylanbaǵan, keıbir jaǵdaıda myń teńgege deıingi somalary úshin úmitkerlerdi tirkemegen», - dedi respýblıkalyq komıssııa tóraǵasy Ómirzaq Ozǵanbaev.
Onyń aıtýynsha, saılaýaldy úgit naýqany kezeńinde kandıdattarǵa ózderiniń saılaý qoryn qurýǵa quqyq berilgen. Alaıda kandıdattar mundaı qordy belsendi paıdalana almaǵan. «Úgit naýqany barysynda keıbir kemshilikter oryn alǵanyn atap ótýdi jón sanaımyz. Máselen, «Qazaq úni» gazeti Jezqazǵan óńirindegi mektep dırektorlarynyń osy saılaýǵa kandıdat retinde óz yqylastarynan tys túsip otyrǵanyn habarlaǵan. Sonymen birge, Almaty oblysy Alakól aýdanyna qarasty bir aýylǵa on jeti jyl boıy ákim bolyp kelgen azamat Ahmetjanov saılaýǵa túsýshiler tizimine onyń kandıdatýrasyna aýdan ákiminiń bóget jasaýyna baılanysty enbeı qalǵandyǵyn aıtyp shaǵymdanǵan. Aıtylǵan kemshilikter elimizde aýyl ákimderiniń alǵash ret ótkizilýimen baılanysty oryn alǵanyn aıtqymyz keledi. Sonymen qatar, aýyl ákimderin keń kólemde saılaý naýqanyn quqyqtyq jáne uıymdastyrýshylyq tustary buryn sońdy bolmaǵandyǵyn eskerýimiz qajet», - dep atap ótti komıssııa tóraǵasy Ó. Ozǵanbaev.
Budan bólek, Saılaýdy qadaǵalaý jónindegi respýblıkalyq qoǵamdyq komıssııa saılaý zańnamasyn jetildirý boıynsha birqatar usynystar jasady. «Aýyl ákimdiginen kandıdatqa qoıylatyn biliktilik talaptary tym joǵary. Tipti, keıde aýylda laıyqty kandıdattar da taba almaı qalyp jatamyz. Onyń ústine ákimdikke kandıdat eki adamnan kem bolmaýy tıis. Osyǵan oraı, aýyl ákimdigine kandıdattarǵa qoıylatyn talaptar qaıta qaralýy tıis. Atap aıtqanda, olardyń jumys ótiline qoıylatyn talaby kemitilip, bul ótilde tek memlekettik qyzmette ǵana emes, jeke sektordaǵy basshylyq qyzmeti de esepke alynýy kerek», - deıdi Ó. Ozǵanbaev.
Budan bólek, respýblıkalyq komıssııa jergilikti halyqtyń elimizde ótken saılaýdy qabyldaý deńgeıin zerdeleý, saraptaý maqsatynda óńirlerde áleýmettik ekspress-saýalnama júrgizýdi júzege asyrmaq. Bul qoǵamdyq pikir erekshelikteri aldaǵy ýaqytta BAQ-ta jarııalanatyn bolady.
«Jalpy, qorytyndylaı aıtsaq, elimizde aýyl ákimderiniń saılaýy zań deńgeıinde ótti dep málimdeýge bolady. Bul keń aýqymdaǵy demokratııalyq saılaýdyń tuńǵysh tájirıbesi bolatyn. Bizdiń komıssııa turaqty negizde jumys istep, eldegi saılaýǵa qadaǵalaý máselelerine aldaǵy ýaqytta da den qoıatyn bolady. Sondyqtan da, bundaı tájirıbe áli de jetile túsedi degen senimdemiz», - dedi komıssııa tóraǵasy.
Eske salsaq, QR Prezıdentiniń Jarlyǵyna sáıkes, aǵymdaǵy jyldyń 5-9 tamyz aralyǵynda elimizdiń 14 oblysynda aýdandyq mańyzy bar qalalar, aýyldyq okrýgter, aýyldyq okrýgterdiń quramyna kirmeıtin kentter men aýyldardyń 2457 ákiminiń saılaýy ótip, barlyǵy 2454 ákim saılandy. Úsh aýyldyq okrýgte jeńimpazdar anyqtalǵan joq. Sebebi tańdaýshylardyń daýystary teń bólindi. Atalǵan ákimshilik aýmaqtyq qurylymda tamyzdyń 28-inde qaıta saılaý ótkiziledi.
