Saılaýdy beıpartııalyq baıqaý ortalyǵynda Qazaqstan Halyq partııasynyń ókilderimen kezdesý ótti

NUR-SULTAN. QazAqparat – Beıpartııalyq saılaýdy baıqaý ortalyǵynyń músheleri elordada Qazaqstan Halyq partııasynyń múshelerimen kezdesti, dep habarlaıdy QazAqparat tilshisi.

«Bir aptada bes partııanyń ókilderimen kezdesip, pikir alamasýdy josparǵa engizdik. Osy oraıda Qazaqstan Halyq partııasynyń jumystary jaıynda aqparat alýǵa múddelimiz. Bul turǵyda Saılaýdy beıpartııalyq baıqaý ortalyǵy retinde saılaý naýqanyna baǵa berýge daıyndalyp otyrmyz. Qazirgi kezde baıqaýshylardy daıyndaýǵa ekpin qoıdyq. Osyny eskere otyryp, Qazaqstan Halyq partııasynyń da baıqaýshylary, senimdi ókilderińiz bar. Búgingi pikir almasý barysynda osy adamdardyń jumystarymen tanysýǵa nıettimiz. Saılaý naýqany kezinde birlesip jumys isteý baǵytyn da eskerý kerek. Barlyǵymyzdyń ortaq maqsatymyz – ol saılaýdy qajetti deńgeıde ári ádiletti ótýine jaǵdaı jasaý», - dedi kezdesýde Beıpartııalyq saılaýdy baıqaý ortalyǵynyń jetekshisi, Qazaqstan Azamattyq alıansynyń prezıdenti Baný Nurǵazıeva.

Saılaýdy beıpartııalyq baıqaý ortalyǵynyń basty mindeti – eshkimdi alalamaı, baıqaýshylardyń jumysyn uıymdastyrý.

Óz kezeginde Qazaqstan Halyq partııasynyń ókili Oljas Syzdyqov baıqaýshylardy tirkeý jumystary jalǵasyp jatqanyn atap ótti.

«Baıqaýshylarǵa toqtalsaq, bizdiń maqsat – saılaý ýchaskelerin 100 paıyz qamtý. Qazirgi kezde baıqaýshylardy tirkeý men tizimdi qurý is-sharalary jalǵasyp jatyr. Azamattyq qoǵamnyń baıqaýshy jumystaryna tartylýy óte mańyzdy dep bilemiz. Sebebi azamattyq qoǵam bul protseske tartylsa, onda halyq saılaýǵa senim bildirip, óz tańdaýyn jasaıdy. Sondyqtan saılaýdyń ádil ótýine kepildik beriledi», - dedi QHP respýblıkalyq saılaýaldy shtabynyń tóraǵasy Oljas Syzdyqov.

Eske sala keteıik, bıyl jeltoqsan aıynyń basynda elordada Saılaýdy beıpartııalyq baıqaý ortalyǵy ashylǵan edi.

Bul ortalyq saılaý ýchaskelerin barynsha qamtý úshin álemdik standarttarǵa saı baıqaýshylardy daıyndaıdy.