Saılaýdan soń bıýlletender saqtala ma, joıyla ma

ASTANA. QazAqparat – Saılaýdan keıin bıýlletender saqtala ma, álde joıyla ma? Bul suraqqa BAQ ókilderiniń qatysýymen ótken baspasóz maslıhatynda Ortalyq saılaý komıssııasynyń tóraǵasy Nurlan Ábdirov jaýap berdi, dep habarlaıdy QazAqparat tilshisi.

«Biz zań shyǵarýshy organ emespiz. Usynys ta engizbeımiz. Osyny anyqtap alǵan jón bolar. Biz bekitilgen zań men erejeler aıasynda jumys isteımiz. Degenmen saılaý júıesine qatysty talqylaýlarǵa qatysyp, pikir bildirýge qarsy emespiz. Bıýlletenderdiń qaıda saqtalatyny týraly da norma bar. Tonna-tonna bıýlletender joıylady. Al barlyq hattamalar arhıvke resmı túrde tapsyrylady jáne sonda saqtalady», - dep túsindirdi Nurlan Ábdirov.

OSK dereginshe, zań talabyna saı, saılaý bıýlletenderi 1 aı saqtalady, keıin ol joıylady. Tek hattamalar ǵana saqtalady.

Qosa ketsek, BAQ ókilderiniń qatysýymen ótken baspasóz maslıhatynda Nurlan Ábdirov «Bárine qarsymyn» baǵany bıýlletenge nelikten engizilgenin túsindirip edi.