Saılaýdan keıingi bir jyl: Tramp Maıamıdegi bıznes-forýmda sóz sóıledi

ASTANA. KAZINFORM – AQSh Prezıdenti Donald Tramp Maıamıde ótken bıznes-forýmda sóz sóılep, óziniń saılaýdaǵy jeńisiniń alǵashqy jyldyǵyn atap ótti. Ol bul jeńisti «AQSh tarıhyndaǵy eń mańyzdy jeńis» dep atady.

Memleket basshysy óz sózinde ákimshiliginiń arqasynda amerıkalyq halyq «bılikti óz qolyna qaıta alǵanyn», el «egemendigin qalpyna keltirip, ekonomıkasyn qutqarǵanyn» jetkizdi.

— Búgin biz Amerıka tarıhyndaǵy eń mańyzdy saılaý jeńisiniń bir jyldyǵyn atap ótip otyrmyz. 2024 jylǵy 5 qarashada amerıkalyq halyq bılikti óz qolyna qaıtardy, egemendigimizdi qalpyna keltirdik, ekonomıkamyzdy saqtap qaldyq. Biz birge elimizdi qutqardyq, — dedi Tramp.

Ol búginde AQSh «Altyn dáýirde» ómir súrip jatqanyn atap ótip, bul kezeń eldiń qýatty ekonomıkasymen, myqty shekarasymen, ozyq áskerılerimen, berik halyqaralyq odaqtarymen jáne teńdessiz ulttyq rýhymen sıpattalatynyn jetkizdi.

— Búginde Amerıka álemdegi eń qýatty ekonomıkaǵa, eń berik shekaraǵa, eń myqty qarýly kúshterge, eń senimdi dostyq qatynastarǵa jáne eń qýatty rýhqa ıe. Bul – Amerıkanyń Altyn dáýiri, — dedi ol.

Tramp jumysshylardyń ál-aýqatyna erekshe nazar aýdaryp, sońǵy alty onjyldyqtaǵy eń joǵary eńbekaqy ósimin atap ótti.

— Jumysshylardyń jalaqysy sońǵy 60 jyldaǵy eń joǵary qarqynmen ósip keledi. Men qyzmetke kiriskennen beri zaýyt jumysshylarynyń ortasha jalaqysy 1300 dollarǵa, qurylysshylardyń jalaqysy 2200 dollarǵa, al kenshilerdiń tabysy osy jyly ǵana shamamen 5000 dollarǵa artty, — dedi Tramp.

Sonymen qatar ol jumyspen qamtý jáne áleýmettik qoldaý salasyndaǵy jetistikterin atap ótti. Onyń aıtýynsha, toǵyz aı ishinde 600 myńnan astam amerıkalyq azyq-túlik talondarynan bosatylǵan, al jumys isteıtin azamattar sany 1,9 mıllıonǵa artqan.

— Búginde el tarıhynda buryn-sońdy bolmaǵan deńgeıde amerıkalyqtar jumys istep jatyr, — dedi ol.

Saıası ahýalǵa toqtala kele, Tramp Demokratııalyq partııanyń áreketterin synǵa aldy. Ol Kongrestegi demokrattar úkimet jumysyn ýaqytsha toqtatyp, jańa shyǵyndardy talap etý arqyly «amerıkalyqtardyń ómirin turalatyp otyr» dep málimdedi.

— Úkimet jumysyn toqtatý jónindegi demokrattardyń jaýapsyz sheshimi saldarynan olar Amerıka halqyn kepilge alyp, júzdegen mıllıard dollar jańa shyǵyndardy talap etip otyr. Olar zańsyz ımmıgranttarǵa tegin medıtsınalyq kómek kórsetýdi suraıdy, — dedi Tramp.

Ol demokratııalyq kóshbasshylardy, sonyń ishinde senator Chak Shýmerdi «adamdardyń ómirimen oınaýdy toqtatýǵa» jáne buǵan deıin 30 ret qabyldanǵan «taza qarjylandyrý» týraly zańdy dereý maquldaýǵa shaqyrdy.

Aıta keteıik, Qazaqstan Prezıdenti Qasym-Jomart Toqaev resmı saparmen Vashıngtonǵa keldi. Ol Donald Tramppen kelissózder ótkizip, «Ortalyq Azııa – AQSh» sammıtine qatysady.