Saılaýdan keıin qolǵa alynatyn reformalar qoǵam talqysyna túsýi qajet - Aıdos Sarym
ASTANA. QazAqparat - Belgili qazaqstandyq saıasattanýshy Aıdos Sarym «eń basty másele - saılaýdan keıin qandaı nátıjelerge qol jetkizetinimiz mańyzdy» dep sanaıdy.
«Meniń oıymsha, qoǵamnyń ishinde de, sarapshylar qatarynda da saılaý nátıjesine eshkim asa qatty tańǵalǵan da joq sııaqty, «erteń bılikke kommýnıster kelse, ne bolady» dep ýaıymdamaǵan sııaqty», - dedi ol búgin exit-poll nátıjelerinen keıin qazaqstandyq tilshilerge bergen suhbatynda. - Bul bizdiń elde qalyptasqan saıası júıeniń qoǵamdyq jáne saıası mádenıettiń tikeleı kórsetkishi jáne nátıjesi dep tolyǵymen aıtýǵa bolady. Esterińizge sala keteıin, 1991 jyly saılaý kezinde Nursultan Nazarbaev halyqtyń 91 paıyzǵa ıe bolǵan. Elbasy osy joly da óziniń kóshbasshy ekenin dáleldedi. Ekinshi jaǵynan, bolashaqta Nazarbaevtan basqa eshkim 90 paıyz halyq qoldaýyna ıe bolmaıdy jáne bolmaýy da tıis dep sanaımyn. Prezıdent óziniń o basta belgilegen nátıjesine qol jetkizdi jáne osy nátıjeni saqtap qaldy dep aıtýǵa bolady».
Onyń oıynsha, halyq saılaý barysyna emes, saıası naýqannan keıingi memleket baǵytyna úlken mán berýi tıis.
«Saılaýǵa deıin aıtqan ustanymym da boldy, meniń oıymsha, bul saılaýda eń bastysy ol - saılaý qalaı aıaqtalady degen áńgime emes bolatyn. Saılaý qalaı aıaqtalatynyn jurt meńzep boldy. Basty másele - osy saılaýdan soń ne bolady, qandaı nátıjege qol jetkizemiz. Búgin Prezıdentimizdiń ózi saılaý ýchaskesine barǵan kezde aıtty ǵoı, eń basty máselelerdiń biri - alda qoǵamdy qalaı ilgeri jyljytamyz, bul turǵyda qandaı reformalar kerek degen 5 másele boıynsha qoǵamdyq memlekettik komıssııa qurý jóninde oı aıtty. Estýimshe, Ádilet mınıstrliginde arnaıy memlekettik, úkimettik sheshimder qabyldanyp jatyr eken, sol qoǵamdyq memlekettik komıssııalardyń nemese toptardyń quramy bekitilip, aldaǵy kúnderi jarııalanýy kerek dep oılaımyn. Sonyń ishinde qoǵamda úlken talqylaýlar bolýy tıis. Bizdiń qoǵamǵa qandaı reforma qajet, saıası partııalar týraly, saılaý týraly, baspasóz bostandyǵy zańnamasy qalaı ózgerýi kerek degen taqyryptar boıynsha úlken talqylaýlar júrýi tıis dep esepteımin. Bir jaǵynan qoǵamnyń ishinde de, ekinshi komıssııanyń arasynda. Sol arqyly aldaǵy parlament saılaýy ótkende, sonyń negizinde qabyldanatyn zańdardyń sheńberi, sonyń baǵyty anyqtalyp, sol arqyly qoǵam alǵa jyljıtyndaı, ilgeri júretindeı bolýy kerek sııaqty», - dep atap ótti ol.
Eske sala keteıik, búgin, 27 sáýirde jarııalanǵan exit-poll nátıjeleri boıynsha, kezekten tys prezıdenttik saılaýda Nursultan Nazarbaev 97,5 paıyz daýys jınady.
