Saılaýdaǵy kemshilikti anyqtaýǵa emes, Qazaqstandy qoldaýǵa keldik - baıqaýshy

NUR-SULTAN. QazAqparat - Saılaý protsesindegi kemshilikti anyqtaýǵa emes, Qazaqstandy qoldaýǵa keldik. Bul týraly Táýelsiz Memleketter Dostastyǵy elderiniń baıqaýshylar mıssııasynyń basshysy Sergeı Lebedev aıtty, dep habarlaıdy QazAqparat tilshisi.

«TMD elderi baıqaýshylarynyń mıssııasy osy jyldyń 20 mamyrynan bastap Qazaqstandaǵy jumysyna kiristi. 20 mamyrdan beri 20 uzaqmerzimdi baıqaýshy jumys istedi, mıssııanyń shtaby qurylǵan. Osy ýaqyttyń ishinde uzaqmerzimdi baıqaýshylar birneshe oblysta bolyp, Qazaqstan Respýblıkasynyń barlyq oblystarynda baıqaý boıynsha beketter uıymdastyrdy. Buǵan qosa, uzaqmerzimdi baıqaýshylardyń qatysýymen jalpy mıssııanyń quramyn jasaqtady. Dostastyqtyń 8 elinen 432 baıqaýshy kirdi», - dedi ol QR Ortalyq saılaý komıssııasynda uıymdastyrylǵan brıfıng barysynda.

Onyń aıtýynsha, saılaýdy Ýkraına men Moldovadan kelgen baıqaýshylar da qadaǵalaıtyn bolady. Degenmen, olar TMD mıssııasynyń quramyna kirgen joq. Jalpy TMD mıssııasynyń quramyna ómirlik tájirıbesi mol adamdar kirip otyr. Olardyń qatarynda depýtattar, Ortalyq saılaý komıssııalarynyń tóraǵalary men músheleri bar, saılaý protsesin jetik biledi.

Osy rette S.Lebedev TMD elderiniń baıqaýshylar mıssııasy saılaý protsesindegi qandaı da bir kemshilikterdi anyqtaý úshin emes, Qazaqstanǵa qoldaý jáne kómek kórsetý úshin kelgendigin aıtty. Qazaqstandaǵy saılaý naýqany uıymdasqan túrde, tynysh ótip jatqanyna nazar aýdartty.

«Qazaqstan Ortalyq saılaý komıssııasyndaǵy kezdesý barysynda, aýmaqtyq saılaý komıssııalarynyń múshelerimen áńgimelesý barysynda biz negizgi maqsatymyz saılaýshylardyń óz erkin bildirý quqyǵyn qamtamasyz etý degen ortaq pikirge keldik. Daýys berý tártibi, saılaý ýchaskesinde tirkeý týraly aqparattar barlyq saılaý ýchaskesinde bar», - dedi mıssııa basshysy.