Saılaýda partııanyń bedeli, oǵan degen halyqtyń senimi kórinedi - Nursultan Nazarbaev

NUR-SULTAN. QazAqparat - QR Tuńǵysh Prezıdenti - Elbasy Nursultan Nazarbaev aldaǵy saılaý týraly pikirimen bólisti, dep habarlaıdy QazAqparat tilshisi.

«Saılaýdyń qorytyndysy boıynsha «Nur Otan» partııasy jetekshi saıası partııa retinde óziniń mártebesin kúsheıtýi kerek. Bizdiń alǵan baǵytymyz durys. Al halyq bizge senedi. El azamattary bizge árqashan senýi kerek. Soǵan jumys isteýimiz qajet. Barlyǵyna tek sáttilik tileımin», - dedi Elbasy partııanyń kezekten tys XIX sezinde.

Aıta keteıik, sezd kezinde Elbasy «Nur Otan» partııasynyń kandıdatyn qoldaýǵa qatysty tapsyrmalar berdi.
«Bizge úlken jumysty atqarý qajet. Saılaýda partııanyń bedeli, oǵan degen halyqtyń senimi kórinedi. «Nur Otan» partııasyna belsendi ári senimdi saılaý naýqanyn ótkizý kerek. Aldymen respýblıkalyq saılaý shtabynyń jumysyn uıymdastyrý qajet. Bizde ol jaǵynan tájirıbe bar. Ony qalaı uıymdastyrý qajettigin bilemiz. Menińshe, biz ol jumysty abyroımen atqaryp shyǵamyz», - dedi N.Nazarbaev.

Elbasynyń aıtýynsha, senimdi adamdardyń qataryna tanymal qoǵam qaıratkerleri kirýi tıis. Al úgit-nasıhat jumystary kezinde jańa kommýnıkatsııa quraldary men saıası tehnologogııalardy qoldaný qajet. Osy oraıda sheteldik tájirıbeni de zerdelep shyqqan jón.

Aıta keteıik, osy ýaqytta elordada QR Tuńǵysh Prezıdenti-Elbasy, «Nur Otan» partııasynyń Tóraǵasy Nursultan Nazarbaevtyń jetekshiligimen partııanyń kezekten tys HІH sezi ótip jatyr.