Saılaýda ózimizge yńǵaıly adamdy ótkizemiz degendi qoıý kerek — Jańbyrshın
ASTANA. KAZINFORM — Saılaýdy «taza» ótkizýge jete almaı júrmiz. Mundaı pikirdi BIZDIÑ ORTA podkasynda Májilis depýtaty Edil Jańbyrshın bildirdi.
— Prezıdent halyqty memleketti basqarýǵa meılinshe tartý kerektigin aıtyp júr. Halyq memleketti basqarýdan tys qalmaýy kerek. Eger ol máselege etene aralassa, onda ol memleketshil, otanshyl, memleketti qorǵaýǵa, onyń odan ary damýyna múddeli bolady. Sol úshin ony memleketti basqarý isine tartýymyz kerek. Tartýdyń bir joly — saılaý. Bul oraıda saıası saýattylyq, saıası mádenıet degen másele bar. Saıası mádenıettilikke jetken kezde traıbalızmnen, jershildikten, basqa da qoǵamdaǵy aýrýlardan qutylamyz, — dedi Májilis depýtaty.
Onyń atap ótýinshe, áli kúnge deıin saılaýdy «taza» ótkizýge qol jetkize almaı kelemiz.
— Saılaýdy «taza» ótkizýge jete almaı júrmiz. Jalpy, biz aýrýlarymyzdy aıtýymyz qajet. Dárigerge barǵanda aýrýyńdy aıtpasań, dári bere almaıdy ǵoı. «Saılaý protsesin tolyq baqylaýǵa alamyz, ózimizge yńǵaıly adamdy ótkizemiz» degen máseleni qoıý kerek. Halyqtyń saılaǵan adamyn jiberýimiz qajet. Qısaıar, áıteýir búgin-erteń túzelip ketedi, — dedi Edil Jańbyrshın.
Buǵan deıin Edil Jańbyrshın elimizdiń ishki saıasatyndaǵy sharýanyń bárin júıeleıtin birtutas tujyrymdamalyq qujat doktrına ne strategııa bolýy tıistigin aıtqan edi.