Saılaýda Kentaýdyń aq ájeleri naýryz kóje taratty

KENTAÝ. QazAqparat – Túrkistan oblysy Kentaý qalalyq ardagerler uıymy janynan qurylǵan «Ájeler alqasynyń» tóraıymy Roza Jumabaeva bastaǵan ájeler saılaý ýchaskesine kelip, kópshilikti Naýryz merekesimen quttyqtady, dep habarlaıdy QazAqparat.

Olar saılaý ýchaskesindegi baıqaýshylar men daýys berýshilerge ulttyq taǵamdar taratty. Aq kımeshek kıip, ulttyq qundylyǵymyzdy dáriptegen analar kópshilikke naýryz kóje, baýyrsaq, qurt-irimshik úlestirdi.

«Barshańyzdy búgingi elimiz úshin mańyzdy saılaýdyń bastalýymen jáne Naýryz merekesimen quttyqtaımyn. El úshin qyzmet etetin adamdardy tańdaý – eldiń jarqyn bolashaǵy. Sol sebepti bul kún mańyzdy, ári elimiz úshin mereke. Elimizde tek jaqsylyqtar ornasyn», - dep Roza áje aq batasyn berdi.

Túrkistan oblysy ákiminiń baspasóz qyzmetinen málim etkendeı, Kentaý qalasynda 35 saılaý ýchaskesi jumys istep tur. Jalpy, 56 172 saılaýshy daýys beredi dep kútilýde.

Aıta keteıik, búgin elimizde Parlament Májilisiniń jáne jergilikti máslıhattar depýtattaryn kezekten tys saılaý ótip jatyr.