Saılaýda daýys berýshilerdiń qaýipsizdigine basa mán berildi – halyqaralyq baıqaýshy

ATYRAÝ. QazAqparat - QR Parlamenti Májilisi men máslıhattar saılaýyn Reseıden bes dıplomat jáne EQYU elderinen eki dıplomat baqylady, dep habarlaıdy QazAqparat tilshisi Atyraý oblysynyń kommýnıkatsııalar qyzmetine silteme jasap.

Atyraý oblystyq aýmaqtyq saılaý komıssııasynyń habarlaýynsha, óńirge TMD Mıssııasy boıynsha RF-nyń Astrahan oblysynan bes baqylaýshy, sondaı-aq Eýropadan eki dıplomat keldi. Olardyń barlyǵy halyqaralyq akkredıtatsııadan ótip, PTR test tapsyrdy. Sheteldik qonaqtardyń aıtýynsha, aımaqtaǵy daýys berý protsesi joǵary deńgeıde uıymdastyrylǵan.

« Men, eń aldymen, búgingi saılaýdyń joǵary dárejede uıymdastyrylǵanyn atap ótkim keledi. Birinshi kezekte, ol árıne azamattardyń qaýipsizdigine baǵyttalǵan. Barlyq ýchaske sanıtarlyq quraldarmen jabdyqtalǵan: qorǵanys ekrany, sanıtarlyq kilemshe, qol sanıtaızeri, medıtsınalyq maska. Sondyqtan, Atyraý oblysy turǵyndarynyń qaýipsizdigi men densaýlyǵyna alańdamaý kerek dep senemin», - dedi TMD Mıssııasy boıynsha Reseıden kelgen halyqaralyq baqylaýshy Vladımır Zolotokopov.

Aıta keteıik, kúni boıy halyqaralyq baıqaýshylar Atyraý qalasyndaǵy, sondaı-aq aýdan men aýyldardyń saılaý ýchaskelerin aralap shyqty. Dıplomattar daýys berý beketterindegi sanıtarlyq qaýipsizdik sharalaryn baǵalap, saılaý protsesin baqylap otyrdy. Sonymen qatar, elimizdegi áriptesterimen de tájirıbe almasty.