Saılaýda «Barlyǵyna qarsymyn» grafasyn engizý tańdaý erkindigin qamtamasyz etedi – Nyǵmatýlın

NUR-SULTAN. QazAqparat – QR Parlamenti Májilisiniń tóraǵasy Nurlan Nyǵmatýlın saılaý bıýlletenderine «Barlyǵyna qarsymyn» grafasyn engizýdiń mańyzdylyǵyn aıtyp berdi, dep habarlaıdy QazAqparat.

«Barlyǵyna qarsymyn» grafasy Memleket basshysy Qasym-Jomart Toqaevtyń tikeleı tapsyrmasymen saılaý bıýlletenderine engizilýde. Parlament sessııasynyń ashylýynda Prezıdent «Balama pikirler», «Barlyǵyna qarsy daýys berý» sııaqty uǵymdardyń qazaqstandyqtar úshin qalypty jaǵdaı bolýy qajettigin atap ótti. Bul shara birde-bir kandıdatqa nemese birde-bir partııaǵa qanaǵattanbaǵan azamattarǵa óz pikirin bildirýge múmkindik beredi. Halyqaralyq tájirıbeni taldaý kórsetkendeı, bul ustanym – «barlyǵyna qarsymyn» baǵany kóptegen elderdiń saılaý bıýlleteninde bar. Kórshilerimiz Reseıde, Aýstralııa, Ispanııa, Úndistan jáne birqatar Eýropa elderinde bar», - dedi Nurlan Nyǵmatýlın Májilistiń jalpy otyrysynda.

«Sondyqtan, meniń oıymsha, osy grafany engizý arqyly azamattarymyzdyń tańdaý erkindigin qamtamasyz etemiz. Bul óte mańyzdy norma jáne Memleket basshysynyń tikeleı tapsyrmasy ekenin qaıtalaǵym keledi jáne biz bul normany mindetti túrde qoldaımyz», - dedi Májilis tóraǵasy.

Aıta keteıik, QR Ulttyq ekonomıka mınıstri Áset Erǵalıev «Qazaqstan Respýblıkasyndaǵy saılaý týraly» Qazaqstan Respýblıkasynyń Konstıtýtsııalyq zańyna ózgerister men tolyqtyrýlar engizý týraly» QR Konstıtýtsııalyq zańy jobasyn tanystyrdy.

Onda aýdan ákimderin saılaý, Parlament Májilisine saılaý kezinde saıası partııalardyń ótý shegin 7%-dan 5%-ǵa deıin tómendetý jáne barlyq deńgeıdegi saılaý bıýlletenderine «barlyǵyna qarsymyn» grafasyn engizý usynystary aıtylǵan.

Zań jobasyn Májilistiń jalpy otyrysyna qatysyp otyrǵan 95 depýtattyń barlyǵy maquldady.