Saılaýda 100-den astam jas kandıdatqa qoldaý kórsetildi - «Jastar úni» blogy
«Jas kandıdattardy qoldaý maqsatynda «Jastar úni» blok qurǵan edik. Búgin bir aı boıy júrgizilgen jumystyń nátıjesin shyǵarmaqpyz. Úgit-nasıhat naýqany kezinde 100-den astam jas kandıdatqa qoldaý kórsetildi. Onyń ishinde Májilis jáne máslıhattar depýtattyǵyna úmitkerler de bar. Jas kandıdattardy kópshilikke tanystyryp otyrdyq, úgit-nasıhat emes, maqsat – tanystyrý, qoldaý. Jastarmen suhbat, podkast uıymdastyryldy. Osylaısha jas kandıdattardy el-jurtqa kórsetýge tyrystyq. Mine, qýanyshty jańalyq kelip jatyr, aldy Májiliske depýtat bolyp ótip jatyr. Jergilikti máslıhattarǵa depýtat bolyp jatqandar týraly estip jatyrmyz. Árıne, bizdiń arqamyzda depýtat bolyp jatyr dep aıta almaımyz», - dedi «Qazaqstan» ulttyq arnasynyń telejúrgizýshisi, «Jastar úni» blogyn uıymdastyrýshylardyń biri Erqanat Kópjasar elordada ótken brıfıngide.
«Jastar úni» blogyn uıymdastyrýshylardyń aıtýynsha, jas úmitkerlerdi qoldaý sharasy barlyq óńir boıynsha júrdi.
«Budan bir aı buryn Almatyda baspasóz máslıhatyn ótkizdik. Osymen biz jumysymyzdy aıaqtaımyz. Bizge qozǵalys bolý, uıym retinde qurylý týraly usynystar kelip jatyr. Ázirge ondaı oıymyz júr. Degenmen aldaǵy ýaqytta depýtattyqqa jas úmitkerlerdi qoldaý jumysyn jalǵastyratyn bolamyz», - deıdi ol.
Jastardyń deni blok múshelerine kómek surap ózderi habarlasqan.
«Ásirese óńirlerdegi jastar habarlasyp, bizge respýblıkalyq deńgeıde qoldaý surady. Qoldaý tikeleı de, áleýmettik jeliler arqyly usynyldy. Qolymyzdan kelgenshe kómektesýge tyrystyq. Qoldaý barysynda partııasyna, kim ekendigine qaraǵan joqpyz. Ol kandıdat Májiliske nemese máslıhatqa baryp jatyr ma oǵan mán berilmedi. Bárine birdeı qaradyq. Partııalyq tizimderde jas kandıdattardyń usynylýy boıynsha statıstıka jasadyq. Mysaly, 19 adamnyń ishinen 1 jas kandıdat Jalpyhalyqtyq sotsıal-demokratııalyq partııa tiziminde, «Aq jol» - 54 adamnyń 6 - sy, «Baıtaq» - 18 - den 1-i, «Respýblıka» - 25-ten 5-i, «AMANAT» - 90-nan 17-si, «Halyq partııasy» 52-den 3-in usyndy, «Aýyl» partııasy - 25-ten 9-y. Kórsetkishter bar, endi biz bul jas úmitkerlerdiń ekzıt pýlldyń sońǵy nátıjelerine sáıkes tizimge engizilýi boıynsha baqylaımyz», - dedi «Eýrazııa» telearnasynyń telejúrgizýshisi Aqbópe Táńirbergen.
Sondaı-aq blok ókilderi qazirgi ýaqytta qandaı jumys júrgizilip jatqandyǵy týraly aıtyp berdi.
«Qazir biz hattamalardy tekserip, partııalyq tizimderdiń jarııalanýyn kútýdemiz. Jas depýtattarǵa úlken jaýapkershilik júktelgenin atap ótkim keledi, óıtkeni olardy jas saılaýshylar, qoǵamdyq pikir kóshbasshylary qoldaıdy. Olar shynymen de Parlamentke jańashyldyq ákeletinine jáne zań shyǵarýshy organdardy «oıata alatynyna» senimdimiz», - dedi telejúrgizýshi Nursultan Qurman.
