Saılaýbek Boranbaev: Ár saılaý týǵan kúnimdeı áser qaldyrady

AQTAÝ. QazAqparat - Aqtaýlyq Saılaýbek Boranbaevqa ár saılaý erekshe áser etedi. Óıtkeni onyń esiminiń qoıylýy mańyzdy naýqanmen tikeleı baılanysty, dep habarlaıdy QazAqparat tilshisi.

Saılaýbek 2008 jyldan beri ártúrli saılaý naýqandarynda turaqty túrde daýys berip keledi. Ol úshin elimizde ótetin ár saılaý – erekshe kún. Sebebi onyń esimi mańyzdy naýqanmen tikeleı baılanysty. Saılaýbek dúnıege kelgen 1984 jyldyń 4 naýryzynda KSRO Joǵarǵy keńesine depýtattar saılanǵan. Elde ótken úlken saıası sharanyń qurmetine oraı atasy nemeresine Saılaýbek esimin bergen eken.

«Saılaýdan kóp jaqsylyq kútemiz. Men sııaqty Saılaýbekter men Saılaýgúlder dúnıege kelip, halqymyzdyń sany kóbeıe bersin. Men de otbasymmen daýysymdy bergeli otyrmyn. Óıtkeni durys tańdalǵan kandıdat – búkil eldiń bolashaǵynyń kepili. Sondyqtan erteńgi jarqyn ómirimiz úshin tańdaý jasaýymyz kerek», - deıdi Saılaýbek Boranbaev.

Saılaýbek Boranbaev búginde Munaıly aýdandyq bilim bóliminde bas esepshi bolyp jumys isteıdi.

Aıta keteıik, Mańǵystaý oblysynda barlyǵy 8 aýmaqtyq saılaý komıssııasy jáne 243 ýchaskelik saılaý komıssııasy jumys isteıdi. Aqtaý qalasynda 83 saılaý ýchaskesi ornalasqan. Óńirdegi elektorat sany – 411 103 adam. Turǵylyqty tirkeýi joq azamattar úshin 5 daýys berý ýchaskesi ashyldy.