Saılaýaldy jumystar shtattyq rejimde júrip jatyr - halyqaralyq baıqaýshy

NUR-SULTAN. QazAqparat - Búgin QR Ortalyq saılaý komıssııasynda halyqaralyq uıymdar men sheteldik baıqaýshylardyń kezdesýleri ótip jatyr, dep habarlaıdy QazAqparat tilshisi.

«Bizdiń baqylaýymyzsha, saılaýaldy jumystar shtattyq rejimde talapqa saı júrip jatyr. Búgin - tynyshtyq kúni, biraq buǵan deıingi jumys nátıjeleri kórsetkendeı, saılaý zańnamasy buzylǵan joq. Negizgi jumys erteń bastalady. Biz TMD-nyń 7 elinen 37 baıqaýshy keldik. Barlyǵymyz teńdeı saılaý ýchaskelerine bólinip, jumys isteıtin bolamyz. ıAǵnı, tek Nur-Sultan qalasynda ǵana emes, bizdiń baıqaýshylar basqa óńirlerde de jumys atqarady», - dedi TMD parlamentaralyq assambleıasy tobynyń úılestirýshisi Ilıas Ýmahanov OSK-da ótken baspasóz máslıhatynda.

Odan bólek, Ózbekstan Respýblıkasy Májilisiniń Olıı palatasynyń depýtaty, halyqaralyq baıqaýshy Nýrııa Aıtjanova da erteńgi ótetin prezıdent saılaýyna qatysty óz pikirin bildirdi.

«Qazaqstanda ótetin kezekten tys prezıdent saılaýyna Ózbekstannan 54 baıqaýshy keldi. Onyń 20-dan astamy óńirlerde jumys istep jatyr. Ózbekstandyq baıqaýshylar quramynda TMD parlamentaralyq assambleıasy men EQYU músheleri bar. Baıqaýshy retinde aıtarym - saılaýǵa daıyndyq jumystary joǵary deńgeıde ótti. Sol sııaqty barlyq kandıdattarǵa teń múmkindik jasalǵan. Ol halyqpen kezdesý kezinde de jáne BAQ-ta úgit-nasıhat jumystarynyń júrgizilýi barysynda da baıqaldy», - dedi N. Aıtjanova.