Saılaýaldy úgit-nasıhat naýqanyndaǵy bizdiń basty maqsatymyz - zańnyń talapqa saı oryndalýyn qadaǵalaý - Q.Turǵanqulov
ASTANA. 11 naýryz. QazAqparat /Aıdar Ospanalıev/ - Ortalyq saılaý komıssııasy saılaýaldy úgit-nasıhat naýqany kezeńinde saılaý zańnamalarynyń tolyq talapqa saı oryndalýyna erekshe kóńil bóletin bolady.
Bul týraly búgin Ortalyq saılaý komıssııasynyń kezekti otyrysynda atalmysh komıssııa tóraǵasy Qýandyq Turǵanqulov málim etti.
Onyń aıtýynsha, qazirgi tańda Prezıdenttikke kandıdattardyń saılaýaldy úgit-nasıhat jumystary qyzý júrip jatyr. Bul baǵyttaǵy jumystar aldaǵy ýaqytta tek jandana túsetin bolady. Sebebi saılaýaldy úgit naýqany endi ǵana bastaldy. «Soǵan qaramastan biz búginniń ózinde-aq Prezıdenttikke kandıdat retinde tirkelgen kandıdattardyń saıası dodaǵa erekshe belsendilikpen túskendigin baıqap otyrmyz. Kandıdattar ózderine berilgen uıymdastyrýshylyq jáne qarjylyq múmkindikterdi barynsha tıimdi paıdalanýǵa tyrysyp baǵýda. Osyndaı qyzý qarbalas kezeńde Ortalyq saılaý komıssııasynyń basty maqsaty - barlyq kandıdattarǵa buqaralyq aqparat quraldarynda ózderiniń materıaldaryn jarııalaý úshin teńdeı múmkindik beretin saılaý zańnamalarynyń talapqa saı oryndalýyn qadaǵalaý bolyp tabylady», - dedi OSK tóraǵasy.
Onyń sózine qaraǵanda, OSK atalǵan jumystarmen qatar saılaýdy uıymdastyrýshylar men saılaý úderisine qatysýshylardyń barlyǵyn oqytý jumystaryn da belsendi jalǵastyrýda. «Aqpan aıynda biz elordada Astana men Almaty qalalarynyń jáne oblystyq saılaý komıssııalarynyń tóraǵalary úshin arnaıy semınar-keńes ótkizdik. Bul jumystar qazir elimizdiń aımaqtarynda júrgizilýde. Arnaıy belgilengen kestege sáıkes, naýryzdyń 9-19 aralyǵynda semınar-keńester elimizdiń barlyq oblystarynda ótedi. Oǵan qatysý úshin memlekettik organdar men saıası partııalardyń, qoǵamdyq birlestikter men kandattardyń senimdi ókilderi jáne buqaralyq aqparat quraldarynyń ókilderi shaqyrylady. Jıynǵa Ortalyq saılaý komıssııasynyń músheleri men onyń Ortalyq apparatynyń ókilderi de qatysady», - dedi Q.Turǵanqulov.
Sondaı-aq ol sózinde OSK men aımaqtyq saılaý komıssııalary jaqyn kúnderdegi májilisterin daýys berý kúnine daıyndyq máselesine arnaıtyndyǵyn atap kórsetti. Bul otyrystarǵa jergilikti atqarýshy organdar men túrli deńgeıdegi saılaý komıssııalarynyń ókilderi shaqyrylatyn bolady. «Al daýys berý kúnine Astana qalasynyń qalaı daıyndalyp jatqandyǵyn naýryzdyń 18-i kúni talqylaımyz», - dedi OSK tóraǵasy.
