Saılaýaldy baǵdarlamanyń múltiksiz oryndalýyn jeke baqylaýyma alamyn - Prezıdent
ASTANA. QazAqparat – Saılaýaldy baǵdarlamanyń árbir tarmaǵy tolyq oryndalýǵa tıis. Bul týraly Memleket basshysy Qasym-Jomart Toqaev Prezıdentti ulyqtaý rásiminde aıtty, dep habarlaıdy QazAqparat tilshisi.
«Biz ádiletti memleket, ádiletti ekonomıka jáne ádiletti qoǵam quramyz. Osy qaǵıdattar meniń saılaý aldyndaǵy tuǵyrnamamda naqty kórinis tapty. Men onyń ár sózine, ár sóılemine tereń mán berdim. Saılaýaldy baǵdarlamam – bul uzaq oı-tolǵaý men izdenistiń nátıjesi. Tipti, júregimnen shyqty desem, artyq aıtqandyq emes», - dedi Qasym-Jomart Toqaev.
Prezıdent naqty is-sharalardyń júzege asýyn qamtamasyz etetin arnaıy Jarlyqqa qol qoıatynyn aıtty.
«Halyqtyń bastamalarǵa qoldaý bildirip, úlken úmit kútip otyrǵanyn bilemin. Tuǵyrnamanyń árbir tarmaǵy tolyq oryndalýǵa tıis. Men ol úshin barlyq kúsh-jigerimdi jumsaımyn. Osyǵan baılanysty arnaıy Jarlyqqa qol qoıamyn. Bul Jarlyq naqty is-sharalardyń júzege asýyn qamtamasyz etedi. Baǵdarlamanyń múltiksiz oryndalýyn jeke baqylaýyma alamyn», - dedi Q. Toqaev.
Aıta keteıik, búgin el astanasyndaǵy Táýelsizdik saraıynda Qasym-Jomart Toqaevty QR Prezıdenti retinde ulyqtaý rásimi ótýde. Bul ınaýgýratsııa – Táýelsiz Qazaqstan tarıhyndaǵy jetinshi ulyqtaý rásimi.
Eske salsaq, QR Ortalyq saılaý komıssııasynyń shyǵarǵan qorytyndysy boıynga 20 qarashadaǵy kezekten tys prezıdent saılaýynda kandıdat Qasym-Jomart Toqaev saılaýshylardyń 81,31 paıyz daýysyn jınap, jeńiske jetken bolatyn.
