Saılaýaldy naýqan: kásiporyndar básekeniń jańa alańyna aınaldy
ASTANA. KAZINFORM - Quryltaı saılaýyna deıin kún jaqyndaǵan saıyn saılaýaldy naýqan da urannan góri naqty usynystarǵa kóbirek súıene bastady. Keshe partııalar pikirtalasty teleefırden qoǵamnyń naqty suranysy qalyptasatyn oryndarǵa – óndiris oryndaryna, áleýmettik mekemelerge jáne óńirlik jumyspen qamtý ortalyqtaryna alyp shyqty. Al baǵdarlamalar mazmundy ári naqtylana túsken saıyn, partııalar arasyndaǵy pikirtalas ta jalpy urandardan góri qarsylastary usynǵan naqty bastamalar men sheshimder tóńireginde órbı bastady.
Minber ornyna zaýyttar: partııalar ónerkásip óńirleriniń qoldaýyna ıe bolýǵa umtylyp jatyr
Qaraǵandy oblysynda Aıbek Dádebaı bastaǵan «Ádilet» partııasynyń delegatsııasy «Qarmet» AQ eńbek ujymymen kezdesti. Kezdesý barysynda óndiris oryndaryn jańǵyrtý, eńbek qaýipsizdigine baqylaýdy kúsheıtý jáne ındýstrııalyq qalalar úshin bilikti kadrlar daıarlaý máseleleri talqylandy.
Osyǵan uqsas baǵytty Qazaqstan Halyq partııasy da ustandy. Alaıda partııa óndiris ornyna emes, tsıfrlyq damý máselesine basymdyq berdi. Batys Qazaqstan oblysynda partııa ókilderi «Azamattarǵa arnalǵan úkimet» memlekettik korporatsııasy fılıalynyń ujymymen kezdesip, elektrondyq servısterdi damytý máselelerin talqylady.
JSDP saılaýaldy naýqanyn halyqtyń áleýmettik turǵydan osal toptaryn qoldaý máseleleri tóńireginde jalǵastyryp jatyr. Partııa atynan kandıdat Nurııa Baltabaıqyzy Jezqazǵan qalasyndaǵy «Ulytaý Meıirimi» múmkindigi shekteýli jandarǵa arnalǵan qoldaý ortalyǵynda jáne qarttar úıinde boldy.
Óz kezeginde «Aýyl» partııasy shalǵaı eldi mekenderdiń ınfraqurylymyn damytýǵa basymdyq berdi. Qostanaıda partııa tóraǵasy Qaırat Aıtýǵanov depýtattyqqa kandıdattarmen birge «Qazposhta» AQ fılıalynyń ujymyna partııanyń saılaýaldy baǵdarlamasyn tanystyrdy.
«Baıtaq» partııasy da óziniń ekologııalyq baǵytyn jalǵastyryp jatyr. Partııa kandıdaty Vladımır Martel Talǵardaǵy Almaty memlekettik tabıǵı qoryǵynyń qyzmetkerlerimen kezdesip, bıoalýantúrlilikti saqtaý jáne erekshe qorǵalatyn tabıǵı aýmaqtardy qorǵaý máselelerin talqylady.
«Aq jol» partııasy Aqtóbede jas kásipkerlerdi, IT salasynyń jáne bank sektorynyń ókilderin biriktirgen bıznes-startaptar forýmyn ótkizdi. Partııa tóraǵasy Danııa Espaeva shaǵyn jáne orta bıznesti qoldaýǵa baǵyttalǵan saılaýaldy baǵdarlamanyń negizgi bastamalaryn tanystyrdy.
Alaıda dál osy ekonomıkalyq usynystar Respublica partııasynyń synyna ushyrady. Pavlodardaǵy «Qyzyljar-Qus KZ» qus fabrıkasynyń ujymymen kezdesýde partııa kandıdaty Mahambet Hasenov «Aq joldyń» áleýmettik mańyzy bar azyq-túlik taýarlary baǵasyn memlekettik retteýden shyǵarý týraly bastamasyn táýekeli joǵary sheshim dep baǵalady.
Baǵdarlamalar tartysy: pikirtalas naqty bastamalar tóńiregine oıysty
Bir ereksheligi – dál «Aq jol» men Respublica partııalary ózara pikirtalasqa ózgelerge qaraǵanda jıirek túsýde. Óıtkeni eki partııa da birdeı elektoraldyq aýdıtorııanyń qoldaýyna ıe bolýǵa umtylyp jatyr.
Keshe ekologııa men ekonomıka toǵysqan tusta partııalar arasyndaǵy alǵashqy eleýli pikir qaıshylyǵy baıqaldy. Qazaqstan Halyq partııasy JSDP-nyń ekologııalyq talaptardy buzǵan kásiporyndardyń qyzmetin ýaqytsha toqtatý týraly bastamasyn synǵa aldy. Partııanyń pikirinshe, mundaı qadam jalaqynyń keshigýine jáne jumys oryndarynyń qysqarýyna ákelýi múmkin. Onyń ornyna QHP kásiporyndardy memlekettik qoldaý arqyly jańǵyrtyp, ekologııalyq taza tehnologııalardy engizýdi usynady.
Ártúrli kún tártibin biriktiretin ortaq maqsat
Kóterilgen taqyryptardyń aýqymy keń bolǵanyna qaramastan – zaýyttardan bastap tabıǵı qoryqtarǵa deıin – partııalardyń barlyǵy sol kúni qoǵamnyń bir ortaq suranysyna jaýap berýge umtyldy: ózgeristerdiń naqty nátıjesin kórsetý. Biri muny tıimdi memlekettik basqarý men berik ınstıtýttar arqyly kórse, endi biri áleýmettik qorǵaý men aýyldy damytýǵa basymdyq beredi. Al ózgeleri ekologııany qorǵaýdy nemese kásipkerlikti damytýǵa qolaıly jaǵdaı jasaýdy negizgi baǵyt retinde usynady.
