Saılaý joǵary uıymdastyrýshylyq deńgeıde ótti - Sergeı Lebedev

NUR-SULTAN. QazAqparat - Qazaqstandaǵy kezekten tys prezıdent saılaýy joǵary deńgeıde uıymdastyryldy. Mundaı pikirdi TMD Atqarýshy komıtetiniń tóraǵasy - atqarýshy hatshy Sergeı Lebedev aıtty, dep habarlaıdy QazAqparat tilshisi.

"Biz Qazaqstandaǵy saılaý joǵary uıymdastyrýshylyq deńgeıde jáne erkin ahýalda ótti degen qorytyndyǵa keldik. Saılaý Konstıtýtsııaǵa jáne Konstıtýtsııalyq zańǵa saı ótti. Ol ashyq, demokratııaǵa saı jáne báselekestik jaǵdaıda boldy. Jalpy, biz Qazaqstandaǵy saılaýdy baıqaý úshin TMD-nyń 8 elinen 432 adam keldik. Respýblıkanyń barlyq oblystarynda, 3812 saılaý ýchaskesinde boldyq", - dedi ol Ortalyq saılaý komıssııasynda ótken brıfıngte.

Onyń aıtýynsha, TMD baıqaýshylary mıssııasynyń quramyna TMD elderiniń parlamentarııleri, Ortalyq saılaý komıssııalarynyń tóraǵalary jáne dıplomattar kirgen.

Sonymen qatar ol saılaý barysynda oryn alǵan keıbir buzýshylyqtarǵa toqtalyp, oǵan qatysty pikirin bildirdi.

"Jekelegen kemshilikter ondaǵan ǵana, al daýys bergen adamdardyń sany 9 mıllıonnan asyp jyǵylady. Sondyqtan onyń aıasynda bul san túkke turmaıdy. Berilgen daýys sany Qazaqstan halqynyń pikirin bildiredi. Biz bul saılaýdy moıyndaımyz", - dedi Sergeı Lebedev.