Saılaý: Jıgýlı Daırabaev osy aptada 4 óńirdiń saılaýshylarymen kezdesedi

ASTANA. QazAqparat – Qazaqstan prezıdenttigine kandıdat Jıgýlı Daırabaevtyń respýblıkalyq qoǵamdyq shtabynyń jetekshisi Tóleýtaı Rahymbekov «Atameken bıznes» telearnasyna suhbat berdi, dep habarlaıdy QazAqparat tilshisi.

Tóleýtaı Rahymbekovtiń atap ótýinshe, kandıdattyń úgit-nasıhat jumystary qarqyndy júrgizilip jatyr. Jıgýlı Daırabaev osy ýaqytqa deıin Jambyl, Túrkistan, Qyzylorda, Aqtóbe, Qaraǵandy oblystarynyń jáne Shymkent qalasynyń saılaýshylarymen kezdesti. Osy aptanyń sońyna deıin Pavlodar, Jetisý, Almaty oblystarynyń jáne Almaty qalasynyń turǵyndarymen kezdesý ótkizedi.

Munan bólek, kandıdattyń senimdi ókilderiniń qatysýymen elimizdiń barlyq óńirinde belsendi jumys jolǵa qoıylǵan.

Esterińizge sala keteıik, saılaý aldyndaǵy úgit-nasıhat 2022 jylǵy 21 qazanda bastaldy jáne saılaýdan bir kún buryn, ıaǵnı 19 qarashada aıaqtalady. 19 qarasha – respýblıka boıynsha tynyshtyq kúni. Al, 20 qarashada Prezıdent saılaýy ótedi.