Saılaý jarııalanǵan kúnnen bastap prokýrorlar ákimshilik quqyqbuzýshylyq týraly 45 is qozǵady - N.Súıindikov
ASTANA. 16 qańtar. QazAqparat /Rýslan Ǵabbasov/ - Saılaý jarııalanǵan kúnnen bastap prokýrorlar ákimshilik quqyqbuzýshylyq týraly 45 is qozǵady.
Bul týraly búgin ótken brıfıngte Bas prokýratýranyń resmı ókili Nurdáýlet Súıindikov málim etti.
«Saılaý jarııalanǵan kúnnen bastap prokýrorlar 76 qadaǵalaý aktisin engizdi. Onyń ishinde buqaralyq aqparat quraldarynda saılaý zańnamasyn túsindirýge qatysty 1 úndeý jasaldy. Zań buzýshylyqty joıý týraly 2 usynys engizilip, zańdy buzýǵa jol bermeý týraly 28 aldyn ala eskertý jasaldy, sondaı-aq ákimshilik quqyqbuzýshylyq týraly 45 is qozǵaldy»,-dedi resmı ókil.
«Alaıda, zańnamanyń keıbir talaptarynyń buzylýy jekelegen jaǵdaılarda oryn alǵan jáne olar daýys berý qorytyndylaryna áserin tıgizgen joq. Azamattardyń saılaý quqyqtaryn óreskel buzý faktileri anyqtalǵan joq», - dedi ol.
N.Súıindikov jeke jáne zańdy tulǵalardyń ótinishteri men shaǵymdaryn qaraý nátıjelerine toqtala kele: «Saılaý kezeńinde daýys berý kúnin qosa alǵanda prokýratýra organdaryna 536 aryz-shaǵym tústi. Olardyń 64-i Parlament Májilisine, al 472-si máslıhattardyń saılaýyna qatysty boldy. Zańbuzýshylyqtar týraly aqparattardyń negizgi bóligi tıisti tekserýler barysynda óz dálelderin tapqan joq»,-dep atap ótti.
