Saılaý zańyna áıelder men jastarǵa qatysty jańa talap engizilmek - mınıstrlik
«Ózderińizge málim, 2019 jyly 20 jeltoqsanda QR Prezıdenti Qasym-Jomart Toqaev Ulttyq qoǵamdyq senim keńesiniń ekinshi otyrysynda, qoldanystaǵy saıası júıeni reformalaýǵa baǵyttalǵan birqatar usynystar jasady. Atap aıtqanda, Memleket basshysy «partııalyq saılaý tizimderinde áıelder men jastarǵa arnalǵan mindetti 30 paıyz kvotany qarastyrý jáne saıası partııalardy qurý úshin tirkeý talabyn 40 myńnan 20 myń adamǵa deıin tómendetý qajet» ekenin atap ótti. Osyǵan oraı, Prezıdenttiń atalǵan tapsyrmalaryn oryndaý maqsatynda Ádilet mınıstrligimen tıisti zań jobalarynyń tujyrymdamalary ázirlenip, olar osy jyldyń 5 aqpanynda Zań jobalaý qyzmetiniń vedomstvoaralyq komıssııanyń otyrysynda qaralyp, 8 aqpanyndaǵy tıisti hattamaǵa sáıkes maquldandy», - dedi ol QR Ádilet mınıstrligi Qoǵamdyq keńesiniń otyrysynda.
Onyń atap ótýinshe, atalǵan otyrysta maquldanǵan tujyrymdamalar negizinde tıisti zań jobalary ázirlendi. Olar: «Qazaqstan Respýblıkasyndaǵy saılaý týraly» Qazaqstan Respýblıkasynyń Konstıtýtsııalyq zańyna tolyqtyrýlar engizý týraly» Konstıtýtsııalyq Zańynyń jobasy jene «Saıası partııalar týraly» Qazaqstan Respýblıkasynyń Zańyna ózgerister men tolyqtyrýlar engizý týraly» Zańynyń jobasy.
«Partııalyq saılaý tizimderge áıelder men jastar úshin 30 paıyz kvota engizý jónindegi tapsyrmany «Saılaý týraly» Konstıtýtsııalyq zańǵa jáne «Saıası partııalar týraly» Zańǵa túzetýler engizý jolymen iske asyrý usynylady. Bul zańdarda áıelder men jastarǵa arnalǵan kvotalardy partııalyq tizimge engizý týraly talap qoıylatyn bolady», - dedi departament basshysy.
Mınıstrlik ókiliniń aıtýynsha, atalǵan másele boıynsha sheteldik tájirıbe de zerdelengen. Álemdik tájirıbe boıynsha áıelderdiń saılanbaly organdarda ókildik etýin arttyrý quraldarynyń biri - áıelder úshin arnaıy kvotalar engizý. Partııalyq arnaıy kvotalar Eýropa elderinde keńinen qoldanylady jáne tıisti normalar Germanııada, Norvegııada, Frantsııada jáne Belgııada saılaý týraly zań deńgeıinde bekitilgen.
«Qazirgi tańda qalyptasqan álemdik tájirıbeni jáne Qazaqstan áıelder isteri jónindegi qabyldanǵan qujattar tóńireginde usynylyp otyrǵan zańnamalyq normalar áıelderdi eldiń qoǵamdyq-saıası protsesterine ary qaraı belsendi tartýǵa múmkindik beredi dep oılaımyn. Bul rette, Memleket basshysy atap ótkendeı, biz Parlamentke jáne jergilikti ókildi organdarǵa jastardyń kelýine yqpal etýge tıispiz. Osy bólikte usynylyp otyrǵan zańnamalyq sharalar, qoǵamdyq-áleýmettik problemalardy sheshýge baǵyttalǵan konstrýktıvtik oılary bar belsendi jastardy tartýǵa múmkindik beredi», - dedi ol.
