Saılaý zańnamasyna qandaı ózgerister engizildi
ASTANA. KAZINFORM – Astanada Ortalyq saılaý komıssııasy janyndaǵy Saraptamalyq keńestiń otyrysynda jańa Konstıtýtsııaǵa sáıkes ázirlengen saılaý zańnamasyndaǵy ózgerister talqylanyp jatyr. Otyrys barysynda zańnamadaǵy negizgi jańashyldyqtar týraly Saraptamalyq keńestiń múshesi Snejanna Imasheva aıtyp berdi.
Onyń sózinshe, búgingi otyrystyń basty maqsaty — saılaý zańnamasyna engizilgen jańa normalardy talqylap, olardy tájirıbede qoldaný tetikterin pysyqtaý.
— Jalpy saılaý zańnamasy jetkilikti deńgeıde qalyptasqan. Degenmen saılaý protsesinde týyndaıtyn máselelerge baılanysty ony jetildirý qajettiligi týyndaıdy. Sondyqtan búgin zańnamaǵa engizilgen barlyq jańashyldyqty talqylap jatyrmyz, — dedi Snejanna Imasheva.
Onyń aıtýynsha, engizilgen ózgeristerdiń bir bóligi saılaý protsesinde kezdesken praktıkalyq máselelerdi sheshýge baǵyttalǵan.
— Máselen, aýmaqtyq saılaý komıssııasynyń múshesi basqa óńirge kóshken nemese óz mindetin atqara almaıtyn jaǵdaıda onyń orny qalaı jáne qandaı merzimde tolyqtyrylatyny naqty aıqyndaldy. Sonymen qatar sot sheshimimen sybaılas jemqorlyq quqyq buzýshylyǵyn jasaǵany anyqtalǵan azamattardyń saılaý komıssııasynyń múshesi bolýyna jol berilmeıdi, — dedi ol.
Sondaı-aq zańnamada saılaý naýqanyn qarjylandyrý tetikterine qatysty talaptar kúsheıtilgen.
— Saıası partııalar men kandıdattar úgit-nasıhat jumystaryn tek zańda kózdelgen qarjylandyrý tetikteri arqyly júrgizýi tıis. Saılaý qorynan tys qarajatty paıdalanýǵa jol berilmeıdi. Bul saılaý protsesiniń ashyqtyǵyn qamtamasyz etýge baǵyttalǵan mańyzdy ózgeristerdiń biri, — dedi Saraptamalyq keńes múshesi.
Eske salaıyq, buǵan leıin Quryltaı saılaýyna daıyndyqtyń kúntizbelik jospary tanystyrylǵan edi.
