Saılaý zańnamalarynyń buzylǵany jóninde prokýratýra organdaryna 18 aryz-shaǵym tústi - Bas prokýratýra
ASTANA. 15 qańtar. QazAqparat /Aıdar Ospanalıev/ - Osy ýaqytta elimizde ótip jatqan Májilis pen máslıhat depýtattarynyń saılaýynda zańbuzýshylyqtardyń oryn alǵany jóninde prokýratýra organdaryna 18 aryz-shaǵym kelip túsken.
Degenmen, prokýratýra tekserýdi aıaqtaǵan aryzdardyń eshqaısysy rastalmady. Bul týraly Ortalyq saılaý komıssııasynda ótken brıfıngte Bas prokýratýranyń resmı ókili Nurdáýlet Súıindikov málim etti.
Onyń derekterine qaraǵanda, tańǵy saǵat 10 shamasynda Ońtústik Qazaqstan oblysy, Qazyǵurt aýdany prokýratýrasynyń senim telefonyna oblystyq máslıhat depýtattyǵynan úmitkerlerdiń biriniń saılaý shtabynan osy aýdandaǵy №348, №376, №354-inshi saılaý ýchaskelerinde aldyn ala belgi qoıylǵan bıýlletenderdiń taratylyp jatqandyǵy jóninde aqparat túsken. «Osy aqparat boıynsha jedel túrde uıymdastyrylǵan tekserý barysynda - derekter rastalmady. ıAǵnı, senim telefonyna túsken aqparat jalǵan bolyp shyqty», - dedi resmı ókil.
Sondaı-aq onyń aıtýynsha, osy tektes shaǵym Soltústik Qazaqstan oblysynyń prokýratýrasyna da tústi. Shaǵymdanýshynyń sózinshe, Ǵ.Músirepov aýdanynyń Imantaý kentinde ornalasqan Imantaý agrarlyq kolledjiniń 212-shi tobynyń jetekshisi Kolesnıkov, stýdentterge daýys berýge barmaǵan jaǵdaıda shákirtaqysynan aıyratyndyǵyn aıtqan.
«Alaıda tekserý barysynda bul aqparat ta dáleldenbedi. Tipti, aımaqta Imantaý degen kenttiń de eshqandaı kolledjdiń de joq ekendigi belgili boldy. Osyǵan uqsas taǵy bir jaǵdaı tirkeldi. Petropavl qalasynyń №10 mektebinde Raısa Volkova atty ustazdyń oqýshylardyń ata-analaryna «Nur Otan» partııasyna daýys berý týraly ótinish jazyp jibergeni týraly aıtylady. Alaıda bul mektepte R.Volkova atty ustazdyń jumys istemeıtindigi anyqtaldy, shaǵymda kórsetilgen fakti rastalmady», - dedi N.Súıindikov.
Onyń aıtýynsha, prokýratýra organdaryna túsken ózge aryz-shaǵymdar boıynsha tekserý sharalary jalǵasýda. «Aryz-shaǵymdar eń kóp túsken aımaqtardyń aldynda Almaty qalasy tur. Bul qaladan - 6, Shyǵys Qazaqstan oblysynan - 5, al Soltústik Qazaqstan men Almaty oblysynan - 2 aryzdan tústi. Qyzylorda, Aqmola, Qaraǵandy oblystarynan bir-bir shaǵymnan tirkeldi. Olardyń barlyǵy máslıhat depýtattarynyń saılaýyna qatysty bolyp otyr», - dedi resmı ókil.
