Saılaý: Úgit-nasıhat barysynda BAQ-tar qandaı zań buzýshylyqqa jol berdi

ASTANA. QazAqparat – Májilis jáne máslıhattar depýtattary saılaýy aldyndaǵy úgit-nasıhat naýqany barysynda BAQ betterine jarııalanǵan materıaldarda qandaı zań buzýshylyqtarǵa jol berildi? Bul jóninde Aqparat jáne qoǵamdyq damý vıtse-mınıstri Qanat Ysqaqov aıtyp berdi, dep habarlaıdy QazAqparat tilshisi.

«Alǵash ret saılaý zańnamasyna engizilgen ózgeristerge sáıkes saıası partııalardyń onlaın-platformalarda úgit-nasıhat júrgizýine múmkindik berildi. Osyǵan baılanysty bizdiń mınıstrlik tarapynan tıisti jumystar atqaryldy.

Monıtorıng barysynda kelesi kemshilikter anyqtaldy. Onlaın platformalarda kóptegen pikirtalas boldy, suhbat berildi. Biz muny tikeleı úgit-nasıhat retinde qarastyrǵan joqpyz. Ony azamattyq ustanym dep sanaımyz. Onlaın-platforma boıynsha basty qaǵıdat – eger aqyly materıal ornalastyrylsa, olarda tańbalaý bolýy tıis. ıAǵnı materıal kimniń atynan, kimniń qoldaýymen shyqqany kórsetilýi qajet. Sonymen qatar azamattardyń ar-namysy men qadir-qasıetine nuqsan keltirilse, onda aıypty zań boıynsha qýdalanady», - dedi Qanat Ysqaqov Ortalyq saılaý komıssııasynyń otyrysynda.

Spıkerdiń aıtýynsha, saıası partııalardyń BAQ-taǵy jarııalanymdarynyń birkelkiligin halyqaralyq EQYU DIAQB mıssııasy baqylaýshylary qadaǵalady.

Mınıstrlik BAQ betterine jarııalanǵan úgit-nasıhat materıaldarynyń mazmunyna taldaý júrgizdi. (6 telearna jáne 6 ınternet-resýrs). Monıtorıng nátıjesi kórsetkendeı barlyq partııalardyń qyzmeti birkelki boldy.

«Zańbuzýshylyqtarǵa keletin bolsaq, olardyń deni tańbalaýdyń bolmaýy jáne Ortalyq saılaý komıssııasynda tirkelmegen uıymdardyń saýalnama júrgizýi. Atalǵan faktiler óreskel buzýshylyq retinde tirkeldi, tıisti organǵa aqparat jiberildi», - dep tolyqtyrdy Q. Ysqaqov.

Buǵan deıin Bas prokýratýra saılaýaldy naýqanda qandaı zańbuzýshylyqtardyń jıi tirkelgeni týraly aıtqan edi.