Saılaý ýchaskesine kele almaıtyn azamattar tańdaǵan partııasyna qalaı daýys bere alady

NUR-SULTAN. QazAqparat – Ortalyq saılaý komıssııasynyń múshesi Erlan Daýylbaev daýys berý nysanynan tys azamattar saılaýda óz tańdaýyn qalaı jasaı alatynyn aıtyp berdi, dep habarlaıdy QazAqparat tilshisi.

«Eger saılaýshy daýys berý nysanyna dertine, otbasynyń naýqas bir múshesine qaraýyna baılanysty kele almasa nemese alysta bolsa, ol ýchaskelik saılaý komıssııasyna jergilikti ýaqyt boıynsha 12 saǵat buryn jazbasha túrde ótinim bere alady», - dedi Erlan Daýylbaev.

Onyń aıtýynsha úıinen shyǵa almaıtyn saılaýshylar úshin arnaıy qozǵalmaly daýys berý jáshigi qoldanylady. Ýchaskelik saılaý komıssııasynyń hatshysy aldyn ala kelgen ótinimder boıynsha eki qozǵalmaly daýys berý jáshigin ázirlep, jáshikti alyp júretin komıssııa músheleriniń qozǵalys baǵdaryn qurady.

«Eger ótinim sonshalyqty kóp bolmasa, tek bir ǵana jáshikti paıdalanýǵa bolady. Úıinen daýys beretin azamattarǵa baratyn ýchaskelik saılaý komıssııasynyń múshelerine daýys berý bıýlleteni, azamattyń ótinimi men úıinen daýys beretin azamattardyń mekenjaılarynyń tizimi beriledi. Bul rette ýchaskelik saılaý komıssııasynyń múshelerine jetkilikti deńgeıde daýys berý bıýlleteni berilýi kerek. Qozǵalmaly jáshikti ýchaskelik saılaý komıssııasynyń eki múshesi alyp júredi. Daýys berý nysanynan tys daýys beriletin úılerge shyǵar kezde saılaý komıssııasynyń tóraǵasy saıası partııalardyń senimdi ókilin, baıqaýshylar men BAQ ókilderin shaqyrady. Qozǵalmaly jáshikterdi alyp júretin komısısıa múshelerimen birge saıası partııalardyń senimdi ókilderi, baıqaýshylar jáne BAQ ókilderi birge júrýge quqyly», - deıdi ol.