Saılaý ýchaskelerindegi rásimder ashyq ótip jatyr - Ulybrıtanııa parlamentiniń ókili

ASTANA. QazAqparat – Saılaý ýchaskeleriniń jumysyn uıymdastyrý tártibine baıqaýshylar jaqsy baǵa berip otyr. Bul týraly Ulybrıtanııa parlamenti Qaýymdar palatasynyń joǵary saıası keńesshisi Reza Tabrızı aıtty, dep habarlaıdy QazAqparat tilshisi.

«Osyǵan deıin Qazaqstanǵan 2019 jyly ótken saılaýǵa baıqaýshy retinde kelgen bolatynmyn. Atap aıtqanda, 1992 jyldan berý osy elge jıi saparmen kelip júrmin. Jalpy búgingi salaý nátıjesi týraly áli aıtý erterek. Tańerteńnen beri úsh ýchaskege baryp úlgerdim. Bul saılaý ýchaskelerinde daýys berý jaqsy qarqynda júrip jatyr», - dedi R. Tabrızı elordadaǵy Halyqaralyq baıqaýshylarǵa qolǵabys kórsetý ortalyǵyndaǵy brıfıngide.

Osy oraıda ol saılaý ýchaskelerinde zań talaptary saqtalyp otyrǵanyn aıtty.

«Saılaý ýchaskelerindegi rásimderdiń barlyǵy ashyq ótip jatqanyn baıqadyq. Daýys berý úshin múmkindigi shekteýli jandarǵa arnaıy jaǵdaı jasalǵan. Osy jumystardyń barlyǵyn baıqaýshylar jaqsy baǵalap otyr. Saılaý ýchaskelerine kelgen turǵyndardyń da kóńil-kúıi kóterińki ekenin baıqadyq. Jalpy, barshasy osy saılaýdyń ashyq ótkenin qalaıdy jáne daýys berý naýqany zań talaptaryna sáıkes ótýiniń mańyzdylyǵyn jaqsy túsinemiz. Bul óz kezeginde Qazaqstannyń bolashaǵyna úlesin qosa alatyn jastar úshin jaqsy múmkindik», - dedi Ulybrıtanııa parlamentiniń ókili.

Budan buryn habarlanǵandaı, QR Ortalyq saılaý komıssııasynyń málimetine qaraǵanda, saǵat 10:00-degi jaǵdaı boıynsha respýblıkanyń 2 792 962 azamaty bıýlleten aldy. Ol tizimge engizilen azamattardyń 23,37 paıyzyn quraıdy.