Saılaý ýchaskelerinde halyq kezekke turýda - sheteldik baıqaýshy

NUR- SULTAN. QazAqparat - Halyqaralyq baıqaýshy, Grýzııa parlamentiniń depýtaty Kahaber Okrıashvılı Qazaqstanda ótip jatqan prezıdenttik saılaý protsesine qatysty pikirin bildirdi, dep habarlaıdy QazAqparat tilshisi.

«Grýzııadan 3 baıqaýshy keldik. Tańerteńnen ózimizge mindenttelgen jumysqa kiristik. Osy ýaqyt aralyǵynda artyq is-áreket nemese basqalaı tártipbuzýshylyq tirkelgen joq. Saılaýshylar úshin barlyq jaǵdaı jasalǵan ıaǵnı uıymdastyrýshylyq sátinen kemshilikti baıqamadyq. Biz barlyǵy 5 saılaý ýchaskesinde bolýymyz kerek. Úsheýinde boldyq, tústen keıin taǵy eki orynǵa baramyz. Negizinen bizdiń baıqaýshy retinde kez kelgen saılaý ýchaskesine baryp jumysymen tanysýǵa quqyǵymyz bar», - dedi K. Okrıashvılı BAQ-qa arnalǵan baspasóz máslıhatynda.

Sonymen qatar sheteldik baıqaýshy Qazaqstanǵa saılaý baıqaýshysy retinde alǵash kelip otyrǵanyn tilge tıek etti.

«Qazaqstanda ótken saılaýǵa alǵash qatysýym. Degenmen Grýzııa parlamentine 4 ret depýtat retinde saılanǵandyqtan, saılaýdyń jumysy men erejesin bilemin dep aıta alamyn. Árbir saılaý ýchaskesindegi jumys protsesinde qyraǵylyq tanyttyq. Bizdi tań qaldyrǵany halyqtyń belsendiligi, biz barǵan saılaý ýchaskeleriniń birinde halyqtyń kezekke turýyna kýá boldyq», - dedi ol.