Saılaý: «Tynyshtyq kúni» úgit-nasıhat plakattary alynýy tıis pe

NUR-SULTAN. QazAqparat - Saılaý aldyndaǵy «tynyshtyq kúninde» kandıdattarǵa qatysty úgit plakattaryn alý mindetti me? «Zańgerler ádil saılaý úshin» qoǵamdyq birlestiginiń ókilderi atalmysh másele boıynsha BAQ ókilderine tolyqqandy túsinikteme berdi, dep habarlaıdy QazAqparat tilshisi.

«Qazaqstannyń saılaý týraly Konstıtýtsııalyq zańy boıynsha saılaýǵa bir kún qalǵanda jáne daýys berý kúninde eshqandaı nasıhat júrgizilmeýi kerek. Saılaýaldy shtabtar men senimdi ókilder eshqandaı shara ótkize almaıdy. Al kóshelerge ilinip qoıǵan úgit plakattary men ózge de kórneki aqparattardy alyp tastaý mindetti emes. Eń bastysy, orny aýyspaýy tıis. Ony basqa jerge ilý zańbuzyshylyq bolyp esepteledi», - deıdi zańger Sáýle Amandyqova.

Zań ǵylymdarynyń doktory mundaı talap ınternet-basylymdarǵa da qatysty ekenin aıtady.

«BAQ betinde nemese ınternet-basylymda shyqqan úgit materıaldaryn da joıý mindetti emes. Onyń da bastapqy orny saqtalýy kerek. ıAǵnı «tynyshtyq kúnine» deıin buryshta turǵan materıal aldyńǵy betke shyǵyp ketpeýi kerek. Ondaı áreketter saılaý týraly zańdy buzý bolyp sanalady», - deıdi maman.

«Zańgerler ádil saılaý úshin» birlestiginiń habarlaýynsha, «tynyshtyq kúni» 7 maýsymnan 8-maýsymǵa qaraǵan túngi saǵat 0.00-den bastalady. Osy sátten bastap búkil Qazaqstan boıynsha barlyq úgit-nasıhat sharalary toqtaıdy.

Aıta keteıik, shara barysynda zańgerler "Jumys berýshiler qol astyndaǵy qyzmetkerlerinen saılaýǵa qatysqan-qatyspaǵany týraly esepti talap ete ala ma?" degen suraqqa jaýap berdi.

Elimizde kezekten tys prezıdenttik saılaý aldaǵy 9 maýsym kúni ótedi. Prezıdent laýazymyna 7 kandıdat úmitker.