Saılaý tynysh, turaqty ráýishte ótip jatyr – qyrǵyzstandyq baıqaýshy

ASTANA. QazAqparat – Qyrǵyzstan Ortalyq saılaý komıssııasynyń tóraǵasy Nurjan Shaıldabekova Qazaqstandaǵy kezekten tys Prezıdent saılaýyn uıymdastyrý deńgeıi týraly pikir bildirdi, dep habarlaıdy QazAqparat tilshisi.

«Biz birneshe ýchaskede bolyp, Almaty men Shymkent qalalarynda, Túrkistan oblysynda baıqaýshy bolyp jatqan Qyrǵyzstan ókilderimen pikir almastyq. Ózderińiz biletindeı, bul óńir daýys berýshilerdiń saılaýǵa qatysý kórsetkishi boıynsha kósh bastap keledi. Bizdiń baıqaýshylar azamattardyń kóptep qatysyp jatqanyn aıtýda – adamdar saılaý ýchaskelerine jaqsy kóńil kúımen, tipti keıbiri otbasymen kelip jatyr», - dedi Qyrǵyzstan Ortalyq saılaý komıssııasynyń tóraǵasy Nurjan Shaıldabekova.

Qyrǵyzstan ókili bul saılaý quqyqtyq turǵyda da, uıymdastyrý turǵysynan da búkil halyqaralyq mindettemeler men standarttarǵa sáıkes uıymdastyrylyp jatqanyn atap ótti.

«Zańnamanyń óreskel buzylǵanyn kórgen joqpyz. Saılaý ýchaskelerinde daýys berý protsesine, komıssııalardyń jumysyna kıligý baıqaǵan joqpyz.

Saılaý tynysh, turaqty ráýishte ótip jatqanyn atap ótkimiz keledi, Saılaý jarııa negizde, ashyq ótip jatyr. Daýystardy sanaý shynaıy ótedi, halyq memleket basshysy bolýǵa laıyqty adamdy saılaıdy dep úmittenemiz», - dedi Qyrǵyzstan OSK tóraǵasy.

Ortalyq saılaý komıssııasynyń bergen málimetine súıensek, elimizde daýys berý quqyǵy bar 11 827 277 azamat tirkelgen. Olar respýblıka aýmaǵynda ornalasqan 10 101 saılaý ýchaskesinde daýys beredi. Al 53 shet memlekettegi 68 ýchaskede 12 527 Qazaqstan azamatyna daýys berý múmkindigi jasalǵan.

Buǵan deıin OSK kezekten tys Prezıdent saılaýynyń barysyn 641 halyqaralyq baıqaýshy qadaǵalaıtynyn málim etken edi.