Saılaý: Túrkistanda estý qabiletinde aqaýy bar jandarǵa sýrdoaýdarmashylar kómek berýde

TÚRKІSTAN. QazAqparat- Májilis jáne máslıhattar depýtattarynyń kezekten tys saılaýynda múgedektigi bar jandar da óz tańdaýyn kedergisiz jasap jatyr, dep habarlaıdy QazAqparat tilshisi.

Arys qalalyq múgedek jandar qoǵamdyq birlestiginiń tóraǵasy, eki janarynan aırylǵan Serik Qudaıqulov №9 saılaý ýchaskesine tań sárede kelip, daýys berdi. Ol azamattyq mindetin úıde otyryp oryndaýdan bas tartyp, saılaý ýchaskesine kelýge sheshim qabyldaǵan.

Arbamen júretin adamdardyń kedergisiz qımyldaýy úshin barlyq saılaý ýchaskesinde bosaǵasy keń arnaıy kabınalar ornatylǵan. Zaǵıp jandarǵa arnalǵan aýdıo bıýlletender bar. Olar úmitkerlerdiń tizimin qaǵaz betin qolmen sıpap oqı alady. Al estý qabiletinde aqaýy bar jandarǵa sýrdoaýdarmashylar kómek berýde.

«Osyǵan deıingi saılaý naýqandarynan qalǵan emespiz. Qazir múgedektigi bar jandarǵa kedergi joq. Barlyq jerde pandýstar bar. Bizdiń qoǵamdyq birlestikke múshe azamattardyń barlyǵy búgin saılaý ýchaskilerine kelýge bekinip otyr» - deıdi saılaýshy.