Saılaý týraly zańnamany buzýdyń 18 faktisi rastaldy – Bas prokýratýra
«Búgin saılaý protsesine qatysýshylarmen zańnama talaptarynyń jáne azamattardyń konstıtýtsııalyq quqyqtarynyń múltiksiz saqtalýyn qamtamasyz etý biz úshin jumystyń basty basymdyǵy bolyp otyr. Buzýshylyqtar týraly kelip túsken árbir habarlama muqııat tekserýden ótkizilýde.
Qazirgi ýaqytqa 18 tulǵanyń tarapynan «Qazaqstan Respýblıkasyndaǵy saılaý týraly» konstıtýtsııalyq zańnyń talaptary buzylý faktileri rastaldy. Olardyń 12-si, budan buryn aıtylǵandaı, azamattarǵa basqa adamdar úshin daýys berýge múmkindik jasaý maqsatynda saılaý bıýlletenderin berýmen baılanysty. Olardyń beseýi Almaty oblysynda, úsheýi Soltústik Qazaqstan oblysynda, bireýi Jetisý oblysynda jáne Almaty, Shymkent qalalary men Jambyl oblysynda bir-birden», - dedi Bas prokýratýra ókili Qazaqstan telearnasy ótkizip jatqan onlaın telemarafonda.
Sondaı-aq, Azamat Sarǵazın bul quqyq buzýshylyqtar boıynsha kináli dep tanylǵan saılaý komıssııasynyń músheleri Ákimshilik quqyq buzý týraly kodekstiń 110-babymen ákimshilik jaýaptylyqqa tartylýyp jatqanyn atap ótti.
«5 fakt basqa saılaýshy úshin daýys berýmen ushtasqan. Olar boıynsha teń saılaý quqyǵy týraly talapty buzǵan azamattardyń jaýaptylyǵy Ákimshilik quqyq buzý týraly kodekstiń 108-baby boıynsha sheshilýde. Taǵy 2 fakt – tyıym salynǵan kezeńde, ıaǵnı búgin saılaý aldyndaǵy úgittiń júrgizilýi. Olar Batys Qazaqstan jáne Pavlodar oblystarynda oryn alǵan. Bul áreketter Ákimshilik quqyq buzý týraly kodekstiń 102-babynda kózdelgen ákimshilik quqyq buzýshylyqtyń quramyn quraıdy», - dedi Bas prokýratýra ókili.
