Saılaý tıisti zań talaptaryna sáıkes ótip jatyr - ІІM vıtse-mınıstri
ASTANA. 3 sáýir. QazAqparat /Aıdar Ospanalıev/ - Saılaý kúni elimizde qoǵamdyq tártip nemese zańbuzýshylyq áreketteri oryn alǵan joq.
Bul týraly búgin Ortalyq saılaý komıssııasynda jýrnalıstermen brıfıng ótkizgen ІІM vıtse-mınıstri Aleksandr Kýlınıch málim etti.
Onyń sózine qaraǵanda, tártip saqshylary 9725 saılaý ýchaskelerindegi qoǵamdyq tártipti qadaǵalaýda. «Saılaý tynysh, tıisti zań talaptaryna saı ótip jatyr. Ázirge saılaý zańnamalaryn jáne ózge de Qazaqstan zańnamalaryn buzǵan áreketter tirkelgen joq. «QR Saılaý týraly» konstıtýtsııalyq zańyna sáıkes, 3 sáýir biz úshin jumys kúni bolyp esepteledi. Búkil 23 myńnan astam saqshydan turatyn jeke quram saılaý ýchaskelerindegi qoǵamdyq tártip pen qaýipsizdikti qadaǵalaýda. Bizdiń qyzmetkerler sonymen qatar elimizdiń barlyq qalalarynda arnaıy jumystar boıynsha tártipti jiti qadaǵalaý baǵytynda tıisti sharalar atqarýda»,-dedi vıtse-mınıstr.
