Saılaý: ShQO Glýbokoe aýdanyndaǵy 44 ýchaskede halyq óz tańdaýyn jasaýda

Shyǵys Qazaqstan oblysyndaǵy eki aýdanda ákim saılaýy bastaldy, dep habarlaıdy Kazinform.

ShQO-da pılottyq rejımde aýdan ákimderin saılaý bastaldy. Jeksenbi kúni tańǵy saǵat 7.00-de Glýbokoe aýdany men Altaı aýdanynyń saılaý ýchaskeleri óz jumysyn bastady.

Glýbokoe aýdanynda barlyǵy 39,5 myńnan astam saılaýshy tirkelgen. Halyq saılaý ýchaskelerine kelip óz tańdaýyn jasap jatyr.

«Bizdiń aýdan osy saılaýǵa qatysatyn 45 pılottyq óńirdiń qatarynda ekenin bilgen boıda daıyndyqty bastadyq. Bul óte mańyzdy joba, óıtkeni ol qoǵamdy demokratııalandyrý jolyndaǵy progressıvti ózgeristerdi jáne «estıtin memleket» tujyrymdamasyn júzege asyrýdy kórsetedi. Búginde 44 saılaý ýchaskemizdiń barlyǵy der kezinde ashyldy, jumys josparǵa saı júrip jatyr. Bizdiń azamattar bul kúndi asyǵa kútti, daýys berýge belsendi qatysady dep senemin!» - deıdi Glýbokoe aýdanynyń aýmaqtyq saılaý komıssııasynyń tóraǵasy Ksanna Sarycheva.

Aıta keteıik, Memleket basshysy bıylǵy qyrkúıektegi Qazaqstan halqyna Joldaýynda aýdan, oblystyq mańyzy bar qala ákimderin tikeleı saılaý engiziletinin málimdegen bolatyn.

Shet memleketterdiń tájirıbesinen belgili bolǵandaı, tikeleı saılaý kezinde jergilikti atqarýshy organnyń basshysy óz saılaýshylary aldynda úlken jaýapkershilikti sezinedi, bul onyń jumysyna da oń áserin tıgizedi.