Saılaý sharasyna bólingen qarjynyń tıimsiz jumsalýyna jol bermeý kerek - Q.Turǵanqulov
TANA. 25 qarasha. QazAqparat /Aıdar Ospanalıev/ - Ortalyq saılaý komıssııasy teledıdar arqyly Májilis pen máslıhat saılaýyna baılanysty 20-ǵa jýyq beınerolıkter kórsetpek.
Bul týraly búgin elordada ótip jatqan Qazaqstan Respýblıkasy Parlamenti Májilisiniń jáne máslıhattary depýtattarynyń saılaýyna ázirlik jáne ony ótkizý máselelerine arnalǵan semınar-keńes barysynda Ortalyq saılaý komıssııasynyń tóraǵasy Qýandyq Turǵanqulov málim etti.
Onyń aıtýynsha, osy ýaqytta saılaýdyń aqparattyq nasıhat jumystary daıyndalyp, bul baǵyttaǵy sharalar qazir tıisinshe júzege asyrylýda. Aqparat quraldarynan qajetti materıaldar men beınerolıkter kórsetilýde. «Biz osy jolǵy saılaý týraly 20-ǵa jýyq rolık daıyndaımyz», - dedi OSK tóraǵasy.
Onyń sózinshe, OSK elimizdiń aımaqtarynda saılaýdy uıymdastyrý men ony ótkizýge qatysty semınarlar uıymdastyrýdy kózdep otyr. «Jýyq arada úkimet saılaý naýqanyn qarjylandyrý máselesin sheshedi. Osy rette barlyq saılaý komıssııalary qarjy tártibin qatań ustanýlary kerek. Saılaý sharasyna bólingen qarjynyń tıimsiz jumsalýyna jol bermeý kerek. Úkimetten bólingen qarjynyń ıgerilýin biz 25 jeltoqsanǵa deıin aıaqtaımyz. Al 2012 jylǵa josparlanǵan respýblıkalyq bıýdjetten bólinetin qarjyny kelesi jyldyń 15-shi aqpanyna deıin ıgerý kerek bolady», - dedi Q.Turǵanqulov.
