Saılaý: OSK Meıram Qajyken memlekettik tildi erkin meńgergen degen sheshim qabyldady

ASTANA. QazAqparat – Ortalyq saılaý komıssııasynyń lıngvıstıka komıssııasy QR prezıdenttigine «Amanat» kásipodaqtar dostastyǵynan kandıdat Meıram Qajyken «memlekettik tildi erkin meńgergen» degen sheshim qabyldady, dep habarlaıdy QazAqparat tilshisi.

QR Ortalyq saılaý komıssııasynda Meıram Zekeshuly Qajykenniń memlekettik tildi erkin meńgergendigin anyqtaý boıynsha lıngvıstıka komıssııasynyń otyrysy ótti.

Lıngvıstıka emtıhany barlyq úsh kezeń boıynsha ótti. Atap aıtsaq, taqyrypqa saı jazbasha tapsyrma oryndaý, mátin oqý jáne kandıdat tańdaǵan taqyryp boıynsha kópshilik aldynda keminde on bes mınýt sóz sóıleý synaǵyn tapsyrdy.

«Emtıhan aıaqtalǵan soń komıssııa talqylaý ótkizip, qorytyndylady. Otyrystyń qorytyndysyn lıngvıstıka komıssııasynyń tóraǵasy, fılologııa ǵylymdarynyń doktory, professor Ádil Qurmanjanuly Ahmetov baıandady.

Kandıdattyń jazba jumysy «Qazirgi zamanǵy jahandyq máseleler» taqyrybynda boldy. Jazba jumysy mazmuny, stıli, emlesi, tynys belgileri boıynsha baǵalandy. Kandıdat berilgen ýaqytty tolyq paıdalandy.

Ekinshi tapsyrma boıynsha Muhtar Áýezovtiń «Abaı joly» epopeıasynan úzindini oqydy. Úshinshi tapsyrma boıynsha «Yrys aldy – yntymaq» taqyrybyna óz oıyn 15 mınýt kóleminde baıandady.

Emtıhan qorytyndysy boıynsha lıngvıstıka komıssııasy Qazaqstan Respýblıkasynyń prezıdenttigine kandıdat Meıram Zekeshuly Qajykenniń memlekettik tildi erkin meńgergendigi týraly ashyq daýyspen sheshim qabyldady», -dep jazady OSK resmı saıty.

Eske salaıyq, M.Qajyken búgin OSK-da emtıhan tapsyryp jatqanyn jazǵan bolatynbyz.

Sondaı-aq búgin Ortalyq saılaý komıssııasy halyqtyq koalıtsııa atynan prezıdenttikke usynylǵan Qasym-Jomart Toqaevtyń kandıdatýrasyn talaptarǵa saı dep sheshim qabyldady. Sonymen qatar Q.Toqaev lıngvıstıka komıssııasynda nelikten emtıhan tapsyrmaıtynyn túsindirdi.

Foto:diapazon.kz