Saılaý: OSK 473 sheteldik baıqaýshyny tirkedi

ASTANA. QazAqparat – Májilis saılaýyn taǵy 473 sheteldik baıqaýshy qadaǵalaıtyn boldy. Bul týraly Ortalyq saılaý komıssııasynyń hatshysy Muhtar Erman aıtty, dep habarlaıdy QazAqparat tilshisi.

«Halyqaralyq baıqaý ınstıtýty ashylǵannan beri 34 shet memleketten, 9 halyqaralyq uıymnan 322 baıqaýshy resmı tirkeýden ótti. Qazirgi ýaqytta Syrtqy ister mınıstrliginen 17 shet memleketten, 9 halyqaralyq uıymnan 473 baıqaýshyny tirkeýden ótkizý usynyldy. Atap aıtqanda, Avstrııa, Mońǵolııa, Reseı, Soltústik Makedonııa, Ońtústik Afrıka Respýblıkalarynan – 1 baıqaýshydan. Onyń ishinde Soltústik Makedonııa jáne Ońtústik Afrıka Respýblıkalarynan Elshi myrzalary men Reseıdiń Ortalyq saılaý komıssııasy tóraǵasynyń orynbasary bar», - dedi ol.

Komıssııa hatshysynyń dereginshe, Ázerbaıjan, Indonezııa, Majarstan, Rýmynııa, Frantsııa memleketterinen eki kandıdattan usynyldy. Fılıpın, Fınlıandııa, Japonııa memleketterinen 3 kandıdattan akkredıtteý usynyldy. Al Germanııa men Ózbekstannan 5 baıqaýshydan bar.

«EQYU Demokratııalyq ınstıtýttar jáne adam quqyqtary jónindegi bıýro mıssııasynan – 284, EQYU mıssııasynan – 8, TMD-ǵa qatysýshy memleketter Parlamentaralyq assambleıasynan – 22, UQShU Parlamentaralyq assambleıasynan – 1, ShYU-dan 16, IYU-dan – 3, Túrki memleketteri uıymynan jáne Jerorta teńizi Parlamenttik assambleıasynan 2 kandıdatýradan tirkeýge usynyldy», - dedi Muhtar Erman.

Komıssııa otyrysy barysynda sheteldik baıqaýshylardy akkredıtteý týraly resmı qaýly qabyldandy.