Saılaý: Onlaın-saýalnamany tek tirkelgen zańdy tulǵalar júrgize alady

NUR-SULTAN. QazAqparat - Qazaqstan zańnamasyna sáıkes, saılaý kezinde qoǵamdyq pikirge saýalnamany tirkelgen zańdy tulǵalar ǵana júrgize alady. Bul týraly búgin QR Ortalyq saılaý kommıssııasynyń múshesi Anastasııa Şegortsova aıtty, dep habarlaıdy QazAqparat tilshisi.

«Saılaý zańnamasyna sáıkes, qoǵamdyq pikirge saýalnamany Qazaqstan zańnamasymen tirkelgen zańdy tulǵalar júrgize alady. Sonymen qatar qoǵamdyq pikirge saýalnama júrgizý boıynsha 5 jyldyq tájirıbesiniń bolýy týraly talap qarastyrylǵan. Eń bastysy, tıisti qujattarynyń kóshirmeleri tirkelgen habarlama Ortalyq saılaý komıssııasyna aldyn ala túsýi tıis», - dedi ol OSK-de ótken baspasóz máslıhaty barysynda.

Onyń atap ótýinshe, OSK-ge jiberetin atalǵan habarlamada saýalnama júrgizýge qatysatyn mamandar týraly málimetter mindetti túrde kórsetilýi qajet. Mamannyń bul saladaǵy jumys tájirıbesi, qoǵamdyq pikirge saýalnama alý ótkiziletin óńir, zertteý barysynda qoldanylatyn saraptama týraly da málimetter kórsetilýi tıis.

Sonymen qatar zańda saılaýmen baılanysty qoǵamdyq pikir saýalnamasynyń nátıjesin jarııalaýǵa qatysty da talap bar. BAQ saýalnama júrgizgen zańdy tulǵany, saýalnamaǵa tapsyrys berip, tólem jasaǵan tulǵany mindetti túrde kórsetýi kerek.

«Munan bólek, ornyn, saýalnama ótkizý ýaqytyn, aqparatty jınaý jáne saýaldy naqty qurý ádisin, saýalnama alynǵandar sany men nátıjelerdiń qatelik koeffıtsıentin kórsetýge mindetti. Munyń barlyǵy - zań talaby. Daýys berýge deıingi 5 kúnniń ishinde, sonymen qatar daýys berý kúninde nátıjelerdi jarııalaýǵa jol berilmeıdi. Bul normany buzǵany úshin ákimshilik jaýapkershilik qarastyrylǵan», - dedi Anastasııa Şegortsova.

Aıta keteıik, 21 qazanda QR Prezıdenti Qasym-Jomart Toqaev Parlamenti Májilisi depýtattarynyń kezekti saılaýyn taǵaıyndaý týraly Jarlyqqa qol qoıdy.