Saılaý: Nurlan Ábdirov TMD Parlamentaralyq Assambleıa baıqaýshylarymen kezdesti

ASTANA. QazAqparat - Ortalyq saılaý komıssııasynyń Tóraǵasy Nurlan Ábdirov onlaın-formatta TMD-ǵa qatysýshy memleketterdiń Parlamentaralyq Assambleıasynyń baıqaýshylar tobymen jáne TMD PAA Keńesi Hatshylyǵynyń Bas hatshysy - basshysy D. A. Kobıtskıımen kezdesti, dep habarlaıdy QazAqparat.

Kezdesýge QR OSK músheleri Shavqat Ótemisov pen Anastasııa Şegortsova, Astana jáne Almaty qalalarynyń aýmaqtyq saılaý komıssııalarynyń tóraǵalary Baqyt Bektemisova, Janna Asanova, sondaı-aq demokratııa, parlamentarızm jáne azamattardyń saılaý quqyǵyn saqtaý jónindegi Halyqaralyq baıqaýshy ınstıtýtynyń dırektory - TMD PAA Keńesi Hatshylyǵy basshysynyń orynbasary Ivan Mýshket qatysty.

QR OSK Tóraǵasy TMD PAA baıqaýshylaryn saılaý naýqanyna daıyndyq barysy, onyń negizgi kezeńderi týraly habardar etti, sondaı-aq osy ýaqytqa deıin QR Prezıdenttigine kandıdattardy tirkeý aıaqtalǵanyn jáne shtabtar saılaý aldyndaǵy úgit júrgizip jatqanyn atap ótti.

Óz kezeginde, Dmıtrıı Kobıtskıı Ortsaılaýkomǵa kezdesýdi uıymdastyrǵany úshin alǵysyn bildirdi.

TMD PAA ókilderi Qazaqstan Respýblıkasy Prezıdentiniń saılaýyn ázirleý men ótkizýge, onyń ishinde kandıdattardyń saılaý aldyndaǵy pikirsaıystaryn uıymdastyrý men ótkizýge, saılaýshylar sanyna, berilgen esepten shyǵarý kýálikteriniń sanyna, saılaý komıssııalarynyń daýys berý kúnine daıyndyǵyna qatysty túrli suraqtar qoıdy.

Kezdesý barysynda Nurlan Ábdirov TMD PAA baıqaýshylaryn Ortsaılaýkomnyń otyrystary men oqytý is-sharalaryna qatysýǵa shaqyrdy, sondaı-aq TMD PAA ókilderiniń ózderin qyzyqtyrǵan máseleler boıynsha OSK múshelerimen jáne apparatymen kezdesýlerin ótkizýge daıyn ekendikterin bildirdi.

TMD PAA ókilderi QR OSK janynan qurylǵan Sarapshy keńestiń jumysyna onlaın formatta qatysýǵa múddeliligi men daıyndyǵyn bildirdi, sondaı-aq jastardyń saılaý belsendiligin arttyrý boıynsha birlesken jobalardy pysyqtaýdy usyndy.

Kezdesý sońynda eki tarap saılaýdy uıymdastyrý men ótkizý jáne olardy baıqaý boıynsha jumystarǵa ózara tabys tiledi.

Foto: www.election.gov.kz